ހިޔަލަ ޑާންސްގްރޫޕްގައި މިފަހަރު މަޝްހޫރު ޕްރެޒެންޓަރު ފާތިމަތު މަދަދާ ފެންނާނެކަމަށް އެ ގްރޫޕުން ބުނެފިއެވެ.
މަދަދާއަކީ ދިވެހިންގެ މަގުބޫލުކަން ހޯދައިފައިވާ ޕްރެޒެންޓަރެކެވެ. އޭނާ ވަނީ ސަންގުގައި ގިނަ ޕްރޮގްރާމްތަކެއް ހުށަހަޅާފައެވެ. މަދަދާ އެ ގްރޫޕުން ފެންނާނީ އީދު ޝޯތަކުގެ ހޯސްޓެއްގެ ގޮތުގައެވެ.
ހިޔަލަ ގްރޫޕަކީ އަންހެން ކަނބަލުންތަކެއްގެ މައްޗަށް އެކުލެވޭ ޑާންސް ގްރޫޕެކެވެ. ސަގާފީ ނެށުންތަކާއި އަދި ޒަމާނީ ނެށުމަށް ހާއްސަ އެ ގްރޫޕު އޮތީ މިއަންނަ އަޟްހާ އީދުގެ ޝެޑިއުލް މުޅިންހެން ފުލްވެފައެވެ.
ހިޔަލައަކީ ކޮންމެ އީދެއްގެ ފަޅު ފިލުވުމަށް ތަފާތު އީދު ލަވަތަކެއް ނެރޭ ގްރޫޕަކެވެ. އެ ގްރޫޕުން ވަނީ މިއަހަރު އަޟްހާ އީދަށް ވެސް ތަފާތު ލަވައެއް ނެރޭކަމުގެ އުފާވެރި ހަބަރު ވެސް ދީފައެވެ. އެ ގްރޫޕުގެ ފޭސްބުކް ޕޭޖަށް ދޫކޮށްލައިފައިވާ ޕޯސްޓަރުގައި ބުނެފައިވަނީ ރަންކުލައެއް ވިދުމަށް ތައްޔާރުވަމުން އަންނަކަމަށެވެ.
ހިޔަލައިން ބުނީ އެ ގްރޫޕުން ކޮންމެ އީދެއްގައި ވެސް ނެރޭ އީދު ލަވައިން ދައްކުވައިދޭން ބޭނުންވަނީ 1900 ގެ އަހަރުތަކުގެ އީދުގެ ހަނދާންތައްކަމަށެވެ. މިއަހަރުގެ އަޟްހާ އިދު ލަވައިން ވެސް ދައްކުވައިދޭނީ އެފަދަ ހަނދާނެއްކަމަށް ވެސް އެ ގްރޫޕުން ބުނެއެވެ.
މަދަދާއާއެކު ހިޔަލައިން އީދަށް ތައްޔާރުވަމުން އަންނައިރު އެ ގްރޫޕުގައި ތަފާތު މޮޅު ނެށުންތެރިން އަންނަނީ ހަރަކާތްތެރިވަމުންނެވެ. އެގޮތުން މަޝްހޫރު ފިލްމީ ތަރި އަދި ނެށުންތެރިޔާ މަރިޔަމް ޝިފާ ވެސް ހިމެނެއެވެ.
ހިޔަލަ ޑާންސް ގްރޫޕަކީ ބޮޑު ތަރުހީބެއް ހޯދައިފައިވާ ގްރޫޕެކެވެ. އެ ގްރޫޕަކީ އީދު ޝޯ ދިނުމުގެ އިތުރުން ރިސޯޓުތަކުގައި ވެސް ޝޯ ދޭ ގްރޫޕެކެވެ. އަދި ތަފާތު އެހެނިހެން ހަފުލާތަކާއި ޝޯތަކުގައި ވެސް ހިޔަލައިން ދަނީ ފަރި ހަރަކާތްތައް ދައްކުވައިދެމުންނެވެ.
ހިޔަލަ ޑާންސް ގްރޫޕްގެ ފަރި ހަރަކާތެއް ދައްކުވައިދޭން ބޭނުންނަ އެ ގްރޫޕް ބުކް ކުރުމަށް 7537525 އަށް ގުޅުމަށް އެ ގްރޫޕުން އެދެއެވެ.
ކޮމެންޓް