މިއަހަރުގެ ހައްޖު މޫސަށް ވާންޖެހޭ ހުރިހާ ތައްޔާރީތައް މިހާރު ފުރިހަމަކޮށްފައިވާ ކަމަށް ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވެއްޖެ އެވެ.
ޝަކީލް ވިދާޅުވީ މިއަހަރުގެ ހައްޖުގެ ހުރިހާކަމެއް ފުރިހަކޮށްފައިވާ ކަމަށާއި އެގޮތުން ރާއްޖޭން މިއަހަރު ހައްޖަށްދާ 1000 ހައްޖުވެރިންގެ ވިސާ ވެސް މިހާރު އިޝޫކޮށް ނިމިފައިވާ ކަމަށެވެ.
މީގެ އިތުރުން މައްކާގައި ދިވެހީން ތިބުމަށް ހަމަޖެހިފައިވާ ހޮޓާ އިތުރަށް މަރާމާތު ކުރުމުގެ މަސައްކަތް ވެސް އެ އިމާރާތުގެ ވެރިފަރާތާ ވާހަކަ ދައްކައިގެން ކުރަމުން އަންނަ ކަމަށް ޝަކީލް ވިދާޅުވި އެވެ. އަދި ހައްޖުގެ އަޅުކަން އަދާކުރުމަށް ދާ ދިވެހީންނަށް ވީހާވެސް ލުއިފަސޭހަ ގޮތަކަށް ކަންކަން އިންތިޒާމުކޮށްދިނުމަށް ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާ ކަމަށް ޝަކީލް ވިދަޅުވި އެވެ.
ޝަކީލް ވިދާޅުވީ މިދިޔަ އަހަރުގެ ފީޑްބެކަށް ބެލުމަށްފަހު މި އަހަރުގެ ހައްޖުގެ ކަންކަން އިތުރަށް ފުރިހަމަކޮށްފައިވާ ކަމަށެވެ. އެގޮތުން ވިދާޅުވީ މިދިޔަ އަހަރު ދިމާވި ފާހާނާގެ ދަތިކަމަށް ހައްލު ހޯދަދޭން ސައުދީ ސަރުކާރާއި ކަމާބެހޭ މުއައްސަސާތަކާ އެކު މަޝްވަރާކޮށް ފާހާނާގެ އަދަދު ހަތަރެއް ނުވަތަ ފަސްގުނަ އިތުކޮށްފައިވާ ކަމަށެވެ.
ހައްޖުގެ އަޅުކަމަށް ދާ ދިވެހީންނަށް ލުއިފަސޭހަ ގޮތްތައް ހޯދަދިނުމަށް ސައުދީ ސަރުކާރުން ވަރަށް ބޮޑު އިސްކަމެއް ދޭކަން ފާހަގަ ކުރައްވަމުން ޝަކީލް ވަނީ ސައުދީ ސަރުކާރަށް ޝުކުރު އަދާކުރައްވާފަ އެވެ.
ހައްޖުގެ އިންތިޒާމުތަކަށް ބަލާއިރު ހައްޖު މިޝަނާއި އެޑްވާންސް ޓީމް ދަތުރުކުރުމަށް ހަމަޖެހިފައިވަނީ މެއި މަހުގެ ހަތަރު ވަނަ ދުވަހު އެވެ. ހައްޖުވެރިންގެ ފުރަތަމަ ފުލައިޓު އޮންނާނީ މެއި މަހުގެ 15 ވަނަ ދުވަހު އެވެ.
މިއަހަރުގެ ފުލައިޓު ދަތުރުތައް ވެސް ބާއްވާނީ މޯލްޑިވިއަން އަދި ސައުދިއާއިންނެވެ. އަދި ހައްޖު ވެރިން މަދީނާއަށް ދިއުމަށް މިއަހަރު ވެސް ހައިސްޕީޑް ޓްރެއިން ބޭނުންކުރާއިރު ހައްޖުވެރީން އެނބުރި މާލެ އަންނާނީ މަދީ މަގުންނެވެ.
ހައްޖު ކޯޕަރޭޝަނުން ބުނީ މިއަހަރަކީ ދިވެހި ހައްޖުވެރީންނަށް މިހާތަނަށް އެންމެ ފެންވަރު ރަނގަޅު ހިދުމަތްދެވޭ އަހަރަށް ހެދުމަކީ އަމާޒެއް ކަމަށެވެ.
ކޮމެންޓް