ވޯޓުލީ މަދު ބައެއް، ނަތީޖާއާއި މެދު މާޔޫސްވާންވީ ސަބަބެއް ނެތް: ފައްޔާޒް

މަދު އަދަދެއްގެ ބަޔަކު ވޯޓުލީ އިންތިހާބުގެ ނަތީޖާއާއި މެދު މާޔޫސްވާންވީ ސަބަބެއް ނެތްކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.

ހޮނިހިރު ދުވަހު މާލެސިޓީ ކައުންސިލުގެ ތިން ގޮޑިއަކާއި ކުޅުދުއްފުށިީ ސިޓީ ކައުންސިލުގެ ގޮނޑިއެއްގެ އިތުރުން ބިލެތްދޫ ކައުންސިލުގެ ބައި އިލެކްޝަން ބާއްވާފައިވާއިރު، މި އިންތިހާބުތަކުންވެސް އެމްޑީޕީ ކުރިމަތިލާންޖެހުނީ ނާކާމިޔާބީއާއި އެވެ. މި ފަސް ދާއިރާގައި ވޯޓު ދިނުމުގެ ހައްގު ލިބިފައިވާ ޖުމްލަ 13،112 މީހުން ތިބިއިރު، ހަވީރު 16:00އާއި ހަމަޔަށް ވޯޓު ލާފައިވަނީ 3،582 މީހުންނެވެ. އެއީ 1647 އަންހެނުންނާއި 1881 ފިރިހެނުންނެވެ. އަދި ވޯޓު ނުލާ 9،584 ނުވަތަ 73.09 އިންސައްތަ މީހުން ތިއްބެވެ.

މިކަމާއި ގުޅިގެން އެމްޑީޕީގެ ޗެއަރޕާރސަން ފައްޔާޒް އިސްމާއިލް ކުރެއްވި އެކްސްއެއްގައި ވިދާޅުވީ، ކައުންސިލް ބައިއިލެކްޝަންތަކުގައި ވާދަކުރި ކެންޑިޑޭޓުން ކުރެއްވި ހިތްވަރާއި މަސައްކަތަށް ވަރަށް ބޮޑަށް ޝުކުރު ދަންނަވާ ކަމަށެވެ.

އަދި މަދު އަދަދެއްގެ ބަޔަކު ވޯޓުލީ އިންތިހާބުގެ ނަތީޖާ ނުކުތް ގޮތަކާމެދު މާޔޫސްވާންވީ ސަބަބެއް ނެތް ކަމަށް އޭނާ ވިދާޅުވިއެވެ. އަދި، ޕާޓީގެ ހިންގުން ހަރުދަނާކުރުމަށް މިހާރު ކުރާ މަސައްކަތްތަކުގެ ތެރެއިން ކުރިއަށް އޮތީ ކާމިޔާބު ދުވަސްތަކެއް ކަމަށް އޭނާ ވަަނީ ވިދާޅުވިއެވެ.