ކަރަންޓްގެ ޚިދުމަތް ފޯރުކޮށްދޭ ކުންފުނިތަކުން ބޭނުން ކުރާ ޓެރިފް ރޭޓްތަކަކީ މީގެ 12 އަހަރު ކުރިން އެކުލަވާލާފައިވާ ޓެރިފް ރޭޓެއް ކަމަށާއި ކަރަންޓްގެ ޚިދުމަތް ރަނގަޅު ކުރުމަށް ސަރުކާރުތަކުން އެކަށީގެންވާ މަސައްކަތްތަކެއް ކޮށްފައިނުވާ ކަމަށް ކެނދިކުޅުދޫ ދާއިރާގެ މެމްބަރު މުޙައްމަދު އަފޫ ޙާމިދު ވިދާޅުވެއްޖެއެވެ.
އަޅުގަނޑުމެން މި މައްސަލައަށް ބަލާއިރު އަޅުގަނޑުމެންނަށް ފާހަގަ ވަނީ މިއަދު އަޅުގަނޑުމެންނަށް ކަރަންޓްގެ ޚިދުމަތް މި ދޭ ކުންފުނިތަކުން ބޭނުންކުރާ ޓެރިފް ރޭޓަކީ މީގެ 12 އަހަރު ކުރިން އެކުލަވާލެވިފައިވާ ޓެރިފް ރޭޓުތަކެއް. އެގޮތުން އޭރުގައި އެވްރެޖް ހައުސް ހޯލްޑެއް މި ބޭނުން ކުރައްވަނީ 800 ޔުނިޓް އެވްރެޖްކޮށް. އެހެން ނަމަވެސް މިއަދު އެ އަދަދު މި ވަނީ 1500 އަށް އުފުލިގެން ގޮސްފައި - މިއަދުގެ ޖަލްސާގައި އަފޫ ވިދާޅުވިއެވެ.
މީގެ އިތުރުން އަފޫ ވިދާޅުވީ މާސިންގާ ވެރިކަމެއް ކޮށް ނިންމާލިއިރު ފެނަކަ އޮތީ 4.3 ބިލިއަން ރުފިޔާއިން ދަރުވާލާފައި ކަމަށެވެ.
ކަރަންޓު ބިލުތައް ރައްޔިތުން ކަންބޮޑުވާ މިންވަރަށް ބޮޑުވަމުން ދާތީ ބިލުތަކަށް ވާ ގޮތް ސާފުކޮށްދިނުމަށް ގޮވާލާ ހުށަހެޅި ކުއްލި މައްސަލަ ރައްޔިތުންގެ މަޖިލީހުން މިއަދު ބަލައިގަތެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި މައްސަލައިގައި ބުނީ، ސަރުކާރުގެ ފަރާތުން ކަރަންޓުގެ ޚިދުމަތް ދެމުންދާ މައި ދެ ކުންފުނި ކަމަށްވާ ފެނަކަޔާ ސްޓެލްކޯގެ ފަރާތުން ދެމުން ގެންދާ ކަރަންޓު ބިލުތައް ފާއިތުވި މަސްތަކުގައި އަދި ނިމިދިޔަ މަހުގައި އިންތިހާއަށް ބޮޑުވެފައިވާތީ މިކަންކަން ބަލައި ތަހުގީގު ކުރުމަށް ގޮވާލާ ކަމަށެވެ.
ކޮމެންޓް