800 މީހުންގެ ޖާގައަށް ވުރެ އިތުރު މިސްކިތްތައް އޭސީ ކުރުމަށް ސަރުކާރުން ކުރިއަށް ގެންދިޔަ މަޝްރޫއުގައި ސްޓެލްކޯގެ ދައުރު ކާމިޔާބު ކަމާއެކު ނިންމުމަށް މުވައްޒަފުން ކުރި ބުރަ މަސައްކަތުގެ އަގު ވަޒަންކޮށް އެ މުވައްޒަފުންނަށް ކުންފުނިން ހިތްވަރު ދީފި އެވެ.
ސްޓެލްކޯއިން ބުނީ ރަމަޟާން މަހަށް ތައްޔާރުވުމުގެ ގޮތުން، މިސްކިތްތައް އޭސީ ކުރުމަށް ސަރުކާރުން ފެއްޓި ހާއްސަ މަޝްރޫއުގެ ދަށުން އިސްލާމިކް މިނިސްޓްރީން އެ ކުންފުންޏާ ހަވާލު ކުރި މަސައްކަތްތައް ކާމިޔާބުކަމާ އެކު ނިންމާލުމުގައި މުވައްޒަފުން ކުރި ބުރަ މަސައްކަތާއި ދެއްކި ހީވާގި ކަމުގެ އަގު ވަޒަން ކުރުމުގެ ގޮތުން ކުންފުންޏާ ވަގުތީ ގޮތުން ހަވާލުވެހުންނެވި ޑެޕިއުޓީ މެނޭޖިން ޑިރެކްޓާ ޑރ. އަލީ އަޒުވަރާއި، ކުންފުނީގެ ބައެއް އިސްވެރިން އެ މުވައްޒަފުންނާ މިއަދު ބައްދަލު ކުރައްވާފައިވާ ކަމަށެވެ.
މުވައްޒަފުންނަށް ހިތްވަރު ދެއްވުމުގެ ގޮތުން އަޒުވަރު ވިދާޅުވީ މި މަސައްކަތަކީ ހަމައެކަނި ފަންނީ މަސައްކަތެއްގެ ގޮތުގައި ދެކުމުގެ ބަދަލުގައި، މުވައްޒަފުން މިކަން ފުރިހަމަ ކޮށްފައި ވަނީ މުޖުތަމައުގެ ދީނީ އަދި އިޖުތިމާއީ ދުޅަހެޔޮކަމަށް ޓަކައި އަދާ ކުރެވޭ މުހިންމު ހިދުމަތެއްގެ ގޮތުގައި ދެކިގެން ކަމަށެވެ.
އަދި މި މަޝްރޫއު ނިމުމަކަށް އައުމާއެކު، ހޫނު ގަދަ މި ދުވަސްވަރު މިސްކިތްތަކުގައި އަޅުކަން ކުރާ ރައްޔިތުންނަށް ނުހަނު ބޮޑު ފަސޭހައަކާ ހިތްހަމަޖެހުމެއް ލިބިގެންދާނެކަން ވެސް ޑރ. އަޒުވަރު ފާހަގަ ކުރެއްވި އެވެ.
ކޮމެންޓް