މޯލްޑިވްސް ހައްޖު ކޯޕަރޭޝަންގެ ހަވާލުގައި މި އަހަރުގެ މުޅި ރަމަޟާން އުމްރާއަށް ދާ އުމްރާވެރީން ފުރަން ފަށައިފި އެވެ.
ދެ ގުރޫޕަކަށް ބަހާލައިގެން އުމްރާއަށް ދާ މީހުން ފުރުމަށް ހަމަޖެހިފައިވާއިރު ފުރަތަމަ ގުރޫޕުގައި އަންގާރަ ދުވަހު ފުރާފައި ވަނީ 225 އުމްރާވެރީންނެވެ. ދެ ވަނަ ގުރޫޕު، (ފަހު 15ގެ) ގުރޫޕު ފުރާނީ މާރިޗު އެއް ވަނަ ދުވަހު އެވެ.
ހައްޖު ކޯޕަރޭޝަނުން މި ދެ ވަރަކަށް އަހަރު ތެރޭ އަންނަނީ ހައްޖާއި އުމްރާގެ އަޅުކަމަށް ދާ މީހުންނަށް ބޭނުންވާނެ ކަންކަން އިތުރަށް ހަރުދަނާކޮށް، ލުއިފަސޭހަ ހިދުމަތްތަކެއް ފޯރުކޮށްދިނުމަށް ގިނަ މަސައްކަތްތަކެއް ކުރަމުންނެވެ.
އެގޮތުން ހައްޖު މޫސުން ފިޔަވައި އަހަރުގެ ކޮންމެ ދުވަސްވަރެއްގައި ވެސް އުމްރާ ކުރެވޭނެ "ކުރު އުމްރާ" ޕެކޭޖެއް، އެ ކުންފުނިން ވަނީ ދާދި ފަހުން ތައާރަފު ކޮށްފަ އެވެ.
މި ޕެކޭޖަކީ އަހަރު ތެރޭ ލިބޭ ކުރު ޗުއްޓީއެއް ނޫނީ، އެނޫން ދުވަސްވަރެއްގައި އާއިލާ އާ އެކީ ނުވަތަ ރަހުމަތްތެރިންނާ އެކީ ނުވަތަ އެކަނި އުމްރާ ކުރުމަށް ފަސޭހަ އިންތިޒާމުތަކާ އެކު އެ ކޯޕަރޭޝަނުން ތައާރަފު ކުރި ޕެކޭޖެކެވެ.
"ކުރު އުމްރާ" ޕެކޭޖާ ގުޅޭ އިތުރު މައުލޫމާތު ހައްޖު ކޯޕަރޭޝަންގެ 1435 އަދި 7961012 އާ ގުޅާލުމުން ލިބޭނެ އެވެ.
ކޮމެންޓް