ފޭސް 2ގެ ރައްޔިތުންނަށް ދިމާވެފައިވާ ހުރިހާ މައްސަލަތަކެއް ހައްލުކޮށްދޭނަން: ރައީސް

ފުލެޓުތަކުގެ ކުއްޔާއި ސަލާމަތީ ކަންކަން ހިމެނޭހެން ހުޅުމާލޭ ފޭސް 2 ގައި ދިރިއުޅޭ ރައްޔިތުންނަށް ދިމާވެފައިވާ ހުރިހާ މައްސަލަތަކެއް، ވީ އެންމެ ރަނގަޅަކަށް ހައްލުކޮށްދެއްވާނެކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފި އެވެ.

އެމަނިކުފާނު މިޔަގީންކަން ދެއްވީ ފޭސް2 ގެ ރައްޔިތުންނާ މިރޭ ބައްދަލުކުރައްވާ ވާހަކަފުޅު ދައްކަވަމުންނެވެ.

‏ރައީސް ވިދާޅުވީ އެއީ ވަކިވަކި ފަރުދުންނާ ގުޅިފައިވާ ކަންކަން ނުވަތަ މުޅި މުޖުތަމައާ ގުޅިފައިވާ ކަންކަންކަމުގައި ވީ ނަމަވެސް، ވީ އެންމެ ރަނގަޅަކަށް، އަދި އެންމެ ފުރިހަމައަށް ހައްލުކޮށްދެއްވާނެ ކަމަށެވެ.

މި ބައްދަލުވުމުގައި ރައްޔިތުން ހިއްސާކުރި ހިޔާލާއި މަޝްވަރާ، އަދި ފާޅުކުރި ކަންބޮޑުވުންތައް އަޑުއައްސެވުމަށްފަހު ރައްޔިތުންނާ މުހާތަބު ކުރައްވާ ރައީސް ދެއްކެވި ވާހަކަފުޅުގައި މައިގަނޑު ގޮތެއްގައި އަލިއަޅުވާލެއްވީ، އެންމެ ގިނަ ރައްޔިތުންތަކެއްގެ ކަންބޮޑުވުންތަކާ ގުޅިފައިވާ ބޯހިޔާވަހިކަމާއި ގެދޮރުވެރިކަމުގެ ދާއިރާ އަށެވެ.

މީގެ ކުރިން ކަންހިނގާ ދިޔަގޮތުން ހައްލު ނުކުރެވި، ގިނަވެފައި ހުރި މައްސަލަތަކެއް ހުރިކަން ފާހަގަކުރައްވާ ވާހާކަފުޅުދައްކަވަމުން ރައީސް ވަނީ، ރައްޔިތުންގެ ދިރިއުޅުން ވީހާވެސް ލުއިފަސޭހަ ގޮތެއްގައި ކުރިއަށް ގެންދެވޭނެ މަގު ތަނަވަސް ކޮށްދެއްވުމަށް ޓަކައި އެ މަނިކުފާނުގެ ސަރުކާރުގެ ތެރެއިންނާއި، ހައުސިންގް ޑިވަލޮޕްމަންޓް ކޯޕަރޭޝަން (އެޗްޑީސީ)އިން ވެސް މަސައްކަތްތަކެއް ކުރަމުންގެންދާކަމުގެ ޔަގީންކަން ދެއްވާފަ އެވެ.

ފޭސް 2ގެ ފުލެޓުތަކުގައި ދިރިއުޅޭ ރައްޔިތުންގެ ކަންބޮޑުވުމެއްގެ ގޮތުގައި، ކޯޕަރޭޓިވް ސޮސައިޓީތައް ހެދިފައި ނެތްނެތުން ފާހަގަ ކުރެއްވިއިރު، އެ ކަމަށް ނިމުމެއްގެނައުމަށް ޓަކައި އެޗްޑީސީއާ ހައުސިންގް މިނިސްޓްރީން މިހާރު ވެސް މަސައްކަތް ކުރައްވާކަމުގައި ރައީސް ވިދާޅުވި އެވެ.

މީގެ އިތުރުން، ހިޔާ ފުލެޓުތަކުގެ މިލްކުވެރިންނަށް ދެ ލައްކަ ރުފިޔާގެ ޑިސްކައުންޓެއް ދެއްވުމަށް ވިދާޅުވިކަން ތަކުރާރު ކުރައްވަމުން ރައީސް ވަނީ، އެކަން އެގޮތަށް ކުރެއްވުމަށް އެޗްޑީސީއަށް ދަންނަވާފައިވާނެ ކަމަށާ، އެކަމަށް ޓަކައި އެގްރީމަންޓަށް ގެންނަ ބަދަލާއެކު، ދެ ލައްކަ ރުފިޔާ އުނިކުރެއްވުމަށް ޓަކައި ކުރައްވަންޖެހޭ ހުރިހާ ކަމެއް ކޮށްދެއްވާނެކަމުގެ ޔަގީންކަން މިރޭ ދެއްވާފަ އެވެ.

ފައިސާ ހަލާސް ނުކުރެވި ހުރި ފަރާތްތަކުގެ ތަފްސީލުތައް ލިބިވަޑައިގެންނެވިހާ އަވަހަށް، އެކަމުގައި ކުރިއަށް ދެވޭނެ ގޮތެއްވެސް ބައްލަވާނެކަމުގައި ރައީސް ޑރ. މުއިއްޒު ވަނީ ވިދާޅުވެފަ އެވެ.

ކުލީގެ މައްސަލަތަކާ ގުޅިގެން ރައްޔިތުން ފާޅުކުރި ކަންބޮޑުވުންތައް ސީރިއަސްކަމާއެކު ބައްލަވާދެއްވާނެކަމުގައި ރައީސް ވިދާޅުވި އެވެ.

މަހުން މަހަށް ފައިސާ ދައްކަންޖެހޭ މިންވަރު، ރައީސްގެ ވައުދުފުޅާ އެއްގޮތަށް ބަދަލުކޮށްދެއްވާނެ ކަމަށާ، ރައްޔިތުން އެދުނު ގޮތަށް، މަހުން މަހަށް ދައްކަންޖެހޭ މިންވަރާއި، އަގުގެ މައްސަލަ ވެސް ހައްލުކޮށްދެއްވޭތޯ ބައްލަވައިދެއްވާނެކަމުގައި އެ މަނިކުފާނު ވިދާޅުވި އެވެ.