ގެދޮރުވެރިޔާ ސްކީމްގެ ދަށުން ބޯހިޔާވަހިކަން ފޯރުކޮށް ދިނުމަށް، ފަހި ދިރިއުޅުން ކޯޕަރޭޝަން (އެފްޑީސީ) އިން އިމާރާތްކޮށްފައިވާ 4000 ފުލެޓުގެ ޑައުންޕޭމަންޓަށް ގެނެސްދެވެން އޮތް އެންމެ ރަނގަޅު ހައްލު ހޯދަދޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މި ގޮތަށް ވިދާޅުވީ ގަލޮޅުގެ ރައްޔިތުންނާއެކު ރޭ، އިމާދުއްދީން ސްކޫލުގައި ކުރިއަށްގެންދިޔަ މަޝްވަރާ ބައްދަލު ކުރެއްވުމުގައި ވާހަކަފުޅު ދައްކަވަމުންނެވެ.
ރޭގެ ބައްދަލު ކުރެއްވުމުގައި ވެސް އެންމެ ގިނަ ރައްޔިތުން ހިއްސާ ކުރީ ބޯހިޔާވަހިކަމާ ގުޅިފައިވާ ކަންބޮޑުވުންތައް ކަމަށްވާއިރު، ރައީސް ވަނީ ކޮންމެ ރައްޔިތެއްގެ ހިޔާލާއި، ފާޅުކުރެއްވި ޝުއޫރަކީ މުހިންމު ކަމެއްކަން ފާހަގަ ކުރައްވައި، މިއިން ކޮންމެ ކަމަކީ ވެސް، ސީރިއަސްކަމާ އެކު ބައްލަވާނެ ކަންކަން ކަމުގައި ވިދާޅުވެފަ އެވެ.
އެގޮތުން، 4000 ހައުސިން ޔުނިޓްގެ ޑައުންޕޭމަންޓާއި، އެއަށްފަހު މަހުން މަހަށް ދައްކަން ޖެހޭ ކުއްޔާ ގުޅިގެން ބައެއް ރައްޔިތުން ކަންބޮޑުވުން ފާޅު ކުރެއްވިއިރު، ކަމާބެހޭ ފަރާތްތަކާ އެކު މަޝްވަރާ ކުރައްވައިގެން، އެ ކަންބޮޑުވުންތަކަށް ރަނގަޅު ހައްލެއް ގެނެސްދެއްވާނެ ކަމުގައި ރައީސް ވިދާޅުވި އެވެ.
ހަމަ މި މޭރުމުން އެމަނިކުފާނު ވަނީ ގުޅިފަޅުން ގޯތި ލިބޭ ފަރާތްތަކަށް ރަޖިސްޓްރީ ހަވާލު ކުރެވިފައި އޮތް ނަމަވެސް، އެ ގޯތިތައް ކަނޑައި ނުދެވި ލަސްވަމުންދާ ދިއުމާ ގުޅިގެން އާންމުން ހުށަހެޅި ޝަކުވާ ތަކަށް ވެސް ޖަވާބުދާރީވެވަޑައިގެންފަ އެވެ. އެގޮތުން، ގުޅިފަޅުން ގޯތިކަނޑައިދިނުމުގެ ދުވެލި ހަލުވިކޮށް، މާ ގިނަ ދުވަސްތަކެއް ނުވެ، އެ ގޯތިތައް ހައްގުވެރިންނާ ހަވާލުކުރެއްވޭނެ ކަމުގެ ޔަގީންކަން ރައީސް ވަނީ، ރޭގެ މަޝްވަރާ ބައްދަލުވުމުގައި ދެއްވާފަ އެވެ.
ކޮމެންޓް