ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އައު ޓާމިނަލްގެ ޗެކިން ކައުންޓަރުތަކުން ހިދުމަތް ދޭން ފެށުމަށް ތައްޔާރުވުމުގެ ގޮތުން، އެ ކައުންޓަރުތަކަށް އޮޕަރޭޓަރުން އަހުލުވެރި ކުރުވުމަށް ޓްރަޔަލް އެއް ބާއްވައިފި އެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ކުރި އެކްސް ޕޯސްޓެއްގައި ބުނީ އައު ޓާމިނަލްގެ ސީ ޕްލޭން ކައުންޓަރުތަކުން ހިދުމަތް ދޭން ފެށުމަށް ދެ އެއާލައިނެއްގެ އޮޕަރޭޓަރުން އަހުލުވެރި ކުރުވުމަށް ޓްރަޔަލްއެއް ކުރިއަށް ގެންގޮސްފައިވާ ކަމަށެވެ. އެއީ މޯލްޑިވިއަން އާއި ފުލައިމީގެ އޮޕަރޭޓަރުންނަށެވެ.
ދުނިޔޭގެ އެންމެ ބޮޑު ސީ ޕްލޭން އޮޕަރޭޝަން އޮތީ ރާއްޖޭގައި ކަމަށްވާއިރު، އައު ޓާމިނަލުގައި ސީ ޕްލޭނަށް ހާއްސަ 24 ޗެކިން ކައުންޓަރު ވަނީ ގާއިމުކޮށްފަ އެވެ.
ވީއައިއޭގެ އައު ޓާމިނަލް ހުޅުވާފައިވަނީ މި އަހަރުގެ ޖުލައި 26 ވީ ހޮނިހިރު ދުވަހު އެވެ.
އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭ ގޮތަށް ޒަމާނީ ހިދުމަތްތަކާ އެކު ތަރައްގީކޮށްފައިވާ މި ޓާނަލްގެ ފީޗާ ހޯލްގައި 47 ޗެކިން ކައުންޓަރު ހުންނައިރު އަމިއްލައަށް ޗެކިން ކުރެވޭ ހަ ސެލްސް ސާވިސް ޗެކިން ކިއޮސްކް ބަހައްޓާފައިވެ އެވެ.
ކޮމެންޓް