ހައްޖު ކޯޕަރޭޝަނަށް އެހީތެރިކަން ފޯރުކޮށްދިން ފަރާތްތަކުގެ އަގު ވަޒަންކޮށްފި

މޯލްޑިވްސް ހައްޖު ކޯޕަރޭޝަނަށް އެކި ގޮތްގޮތުން އެހީތެރިކަން ފޯރުކޮށްދީފައިވާ ފަރާތްތަކުގެ އަގު ވަޒަންކޮށްފި އެވެ.

ހައްޖު ކޯޕަރޭޝަނުން ބުނީ އެ ތަނުގެ މުވައްޒަފުންގެ އަގުވަޒަން ކުރުމަށާއި، ކުންފުންޏަށް އެކި ގޮތްގޮތުން އެހީތެރިކަން ‏‏ފޯރުކޮށްދީފައިވާ ފަރާތްތަކުގެ އަގުވަޒަން ކުރުމުގެ ގޮތުން ‏‏"އެމްއެޗްސީއެލް އެވޯޑްސް ނައިޓް 2025" ގެ ނަމުގައި ހާއްސަ އެވޯޑް ނައިޓެއް ‏‏ބާއްވާފައިވާ ކަމަށެވެ.

އެ ރަސްމިއްޔާތު ޝަރަފުވެރިކޮށްދެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދެވެ. ރަސްމިއްޔާތުގައި ވަޒީރުގެ އިތުރުން، މެނޭޖިން ޑިރެކްޓަރު މުހައްމަދު ޝަކީލާއި، ޑެޕިއުޓީ މެނޭޖިން ޑިރެކްޓަރު މުހައްމަދު ‏‏ޝިހާބާއި، އަލްއުސްތާޒު އަލީ ޝަރީފާއި، ޗެއާމަނާއި، ބޯޑު މެންބަރުންގެ އިތުރުން މުވައްޒަފުން ވެސް ބައިވެރިވި އެވެ.  ‏

ރަސްމިއްޔާތުގައި ވަނީ ހައްޖު ކޯޕަރޭޝަނަށް އިސްލާމިކް މިނިސްޓްރީން ދެމުން އަންނަ އެއްބާރުލުމާއި އެހީތެރިކަން ‏‏ފާހަގަކޮށް، އެ މިނިސްޓްރީއަށް ހާއްސަ އެވޯޑެއް ދީފަ އެވެ. އެވޯޑާ ހަވާލުވެވަޑައިގަތީ މިނިސްޓަރު ޝަހީމެވެ. އަދި މި ރަސްމިއްޔާތުގައި ކުންފުންޏަށް އެކި ގޮތްގޮތުން އެހީތެރިކަން ފޯރުކޮށްދޭ ‏‏ފަރާތްތަކަށް ވެސް އެވޯޑް ދީފަ އެވެ.

މީގެ އިތުރުން ފާއިތުވި ދެ އަހަރު އެންމެ ގިނަ އަދަދަކަށް މުވައްޒަފުން ހައްޖު ކޯޕަރޭޝަން މެދުވެރިކޮށް ‏‏އުމްރާއަށް ފޮނުވި ކުންފުންޏަށާއި، އަމިއްލަ ފަރުދެއްގެ ގޮތުގައި އެންމެ ގިނައިން އުމްރާއަށް ދިޔަ ފަރާތަށް ވެސް އެވޯޑް ދީފައިވެ އެވެ.‏

ރަސްމިއްޔާތުގައި މިނިސްޓަރު ޝަހީމް ދެއްކެވި ވާހަކަފުޅުގައި ‏‏ހައްޖު ކޯޕަރޭޝަން އަމިއްލަ ފައިމައްޗަށް ތެދުވުމަށާއި، ރައްޔިތުން އިތުބާރު ކުރާ ކުންފުންޏަކަށް ހެދުމަށް ކުރާ މަސައްކަތްތައް ‏‏ފާހަގަ ކުރައްވާ އެ ކަމަށް ތައުރީފު ކުރެއްވި އެވެ.‏

‏ހައްޖު ކޯޕަރޭޝަން އުފައްދާފައި ވަނީ 2013 ވަނަ އަހަރު ރައީސުލްޖުމްހޫރިއްޔާގެ ހާއްސަ ގަރާރަކުންނެވެ.

އެ ގޮތުން މިހާތަނަށް ‏‏ކުންފުނީގެ ތާރިހުން 12 އަހަރު ފާއިތުވެގެން ގޮސްފައިވާއިރު، އެ ރަސްމިއްޔާތުގައި ވަނީ ކުންފުންޏަށް އެންމެ ގިނަ ދުވަހު ‏‏ހިދުމަތްކޮށްދީފައިވާ މުވައްޒަފުންގެ އަގު ވަޒަންކޮށް އެވޯޑު ދީފަ އެވެ. އަދި އެކި ގޮތްގޮތުން ފާހަގަ ކޮށްލެވޭ މުވައްޒަފުންނަށް ވެސް ‏‏އެވޯޑު ދިނެވެ.

‏މީގެ ތެރޭގައި އެމްޑީސް ސްޓާ ޕާފޯމާ އެވޯޑާއި، އެމްޕްލޮއީސް ޗޮއިސް އެކްސެލެންސް އެވޯޑާއި، އައުޓްސްޓޭންޑިން ކޮމިޓްމަންޓް ‏‏އެވޯޑާއި، ހާޒިރީއަށް އެންމެ ރަނގަޅު މުވައްޒަފަށް ވެސް ވަނީ އެވޯޑް ދީފަ އެވެ.‏

‏ރަސްމިއްޔާތުގައި އެމްޑީ ޝަކީލް ދެއްކެވި ވާހަކަފުޅުގައި ހައްޖާއި އުމްރާގެ ނިޒާމު ‏‏ހަރުދަނާ ކުރުމަށް ރައީސް ޑރ. މުއިއްޒު ކުރައްވާ މަސައްކަތްޕުޅާއި ދެއްވާ އިރުޝާދުތައް ފާހަގަ ކުރައްވާ ޝުކުރު ‏‏އަދާ ކުރައްވާފައިވެ އެވެ.

އިސްލާމިކް މިނިސްޓަރު ޝަހީމް އެ ކުންފުންޏާ މެދު ބަހައްޓަވާ ގާތްކަމާއި ކުރައްވާ އިތުބާރަށް ވެސް ‏‏މެނޭޖިން ޑިރެކްޓަރު ޝުކުރު އަދާ ކުރެއްވި އެވެ. މީގެ އިތުރުން މެނޭޖިން ޑިރެކްޓަރު ވަނީ ފާއިތުވި މުއްދަތުގެ ތެރޭގައި ‏‏ރައްޔިތުންގެ އިތުބާރާއި ލޯބި ކުންފުންޏަށް ހޯދުމަށް މުވައްޒަފުން ކުރި ބުރަ މަސައްކަތް ފާހަގަ ކުރައްވާ އެ މުވައްޒަފުންނަށް ‏‏ތައުރީފު ކުރައްވާފަ އެވެ.

‏ހައްޖު ކޯޕަރޭޝަނުން އަންނަނީ ކުންފުނީގެ ހިންގުން ހަރުދަނާކޮށް، ފައިދާވާ ކުންފުންޏަކަށް ހެދުމަށް ގިނަ މަސައްކަތްތަކެއް ‏‏ކުރަމުންނެވެ.

އެ ގޮތުން ބޭރު ފައިސާ ހޯދުމަށް ހުރި ދަތިތައް ހައްލު ކުރުމަށާއި، ހައްޖަށް ދިއުމަށް ނަގާ އަގު ކުޑަ ކުރުމަށް، ‏‏ކުންފުންޏަކީ ފައިދާވާ ކުންފުންޏަކަށް ހެދުމަށް ސަރުކާރުގެ އެއްބާރުލުމާ އެކު މިހާރުގެ މެނޭޖުމަންޓުން އަންނަނީ ގިނަގުނަ ‏‏މަސައްކަތްތަކެއް ކުރަމުންނެވެ.‏