މާރަންދޫ - "ސޮސައިޓީ ކަޕް 2025" މުބާރާތުގައި މިއަދު ހަވީރު އެފްސީ އިންޖަރީ އާއި އެފްސީ އީޒެޑް ބައްދަލުކުރި މެޗު، 3-1 ގެ ނަތީޖާއަކުން އެފްސީ އިންޖަރީ ކާމިޔާބުކޮށް، މުބާރާތުގެ ފައިނަލަށް ދިޔުމަށް އޮތް އަމިއްލަ ބާރު ދަމަހައްޓައިފި އެވެ.
މި މެޗަކީ ފޯރި ގަދަ، ވާދަވެރި އަދި ބަލާހިތްވާ ކަހަލަ ކުޅުމެއް ފެނިގެންދިޔަ މެޗެކެވެ.
މެޗުގެ ފުރަތަމަ ގޯލް، އެފްސީ އިންޖަރީ ޓީމަށް ކާމިޔާބުކޮށްދިނީ އެ ޓީމުގެ ޖާޒީ ނަންބަރު 22 އަހުމަދު މުހައްމަދު އެވެ. އެއަށްފަހު، އެފްސީ އިންޖަރީގެ ދެ ވަނަ ލަނޑު ކާމިޔާބުކޮށްދިނީ ޖާޒީ ނަންބަރު 17 ސަމްހާން އަބްދުއްރަހުމާން އެވެ.
އެފްސީ އިންޖަރީގެ ތިން ވަނަ ލަނޑަކީ އެފްސީ އީޒެޑުގެ ޖާޒީ ނަންބަރު 12 އުނައިޝް އަބްދުﷲ އަތުން ބައިކޮޅަށް ވަން ގޯލެކެވެ. މެޗުގައި އެފްސީ އީޒެޑުގެ ހަމަ އެކަނި ލަނޑު އެ ޓީމަށް ކާމިޔާބުކޮށް ދިނީ ޖާޒީ ނަންބަރު 11 ސަމާހު ހަސަން އެވެ.
މެޗުގެ މޮޅު ކުޅުންތެރިއަކަށް ހޮވުނީ އެފްސީ އިންޖަރީގެ ދެ ވަނަ ލަނޑު ކާމިޔާބުކޮށްދިން އެ ޓީމުގެ ޖާޒީ ނަންބަރު 17 ސަމްހާން އަބްދުއްރަހުމާން އެވެ. އޭނާ އަންނަނީ މި މުބާރާތުގައި ހުނަރުވެރި މޮޅު ކުޅުމެއް ދައްކަމުންނެވެ.
މި މޮޅާއެކު އެފްސީ އިންޖަރީއަށް ފައިނަލުގެ ޖާގައެއް ކަށަވަރުކުރުމަށް އޮތް އަމިއްލަ ބާރު ލިބުނީ އެވެ.
ސޮސައިޓީ ކަޕް 2025 ގެ އިތުރު މެޗެއް ނޮވެމްބަރު ނުވައެއް ވާ އާދިއްތަ ދުވަހު ވެސް އޮންނާނެ އެވެ. އެ މެޗުގައި ބައްދަލު ކުރާނީ އެފްސީ އިންޖަރީ އާއި އެފްސީ އެކުވެރިންނެވެ.
ކޮމެންޓް