ހއ. މާރަންދޫ ޔޫތު ސޮސައިޓީގެ ފަރާތުން އިންތިޒާމުކޮށްގެން ބާއްވާ ސޮސައިޓީ ކަޕް 2025 ގައި، އެފްސީ އެކުވެރިންނާ ދެކޮޅަށް ނުކުމެ ކުޅުނު މެޗުން އޯލް ޔުނައިޓެޑުގެ ފެންވަރު ދައްކާލައިފި އެވެ.
މިއަދު ހަވީރު މާރަންދޫ ނާކޮޅު ސްޓޭޑިއަމްގައި ކުޅުނު އެ މެޗަކީ އޯލް ޔުނައިޓެޑަށް ކޮންމެހެން ވެސް މޮޅުވާން މަޖުބޫރު މެޗެކެވެ.
ކަން އެހެން އޮއްވާ އެފްސީ އެކުވެރިންނާ ދެކޮޅަށް ނުކުމެ ކުޅުނު ފޯރި ގަދަ މެޗުން އޯލް ޔުނައިޓެޑަށް ކާމިޔާބު ލިބުނީ 5-0 ގެ ތަފާތު ބޮޑު ނަތީޖާއަކުންނެވެ.
މެޗު ފެށިގެން ނިމެންދެން ވެސް އޯލް ޔުނައިޓެޑުގެ ކުޅުންތެރިން ގެންދިޔައީ އާދަޔާ ހިލާފު ހިތްވަރު ގަދަ ކުޅުމެއް ދައްކަމުންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެސް އޯލް ޔުނައިޓެޑުގެ ކުޅުންތެރި އެކެވެ.
އެއީ ޖާޒީ ނަންބަރު ހަތެއް ހުސައިން އާދަމް އެވެ. އޭނާ ވަނީ މެޗުގެ ތެރެއިން ގިނަ ރަނގަޅު ހަމަލާ ތަކެއް އުފައްދާފަ އެވެ.
ސޮސައިޓީ ކަޕް 2025 ގެ ދަށުން މާދަމާ ވެސް މެޗެއް ކުޅޭނެ އެވެ. މާދަމާ ބައްދަލުކުރާނީ އެފްސީ އިންޖަރީ އާއި އީޒެޑް އެވެ.
ކޮމެންޓް