ގައްޒާގެ ރައްޔިތުންނަށް ބޭނުންވާ އެހީގެ ސާމާނު ހިފައިގެން ދަތުރުކުރަމުންދިޔަ ގްލޯބަލް ސުމޫދު ފްލޯޓިއްލާއަށް އިޒްރޭލުން ހަމަލާދީ ހުރަސްއެޅުން ރައީސް ޑރ. މުހައްމަދު މުއިއްޒު ކުށްވެރިކުރައްވައިފި އެވެ.
އިޒްރޭލުގެ އެ އަމަލު ކުށްވެރިކުރައްވާ ރައީސް ކުރެއްވި އެކްސް ޕޯސްޓެއްގައި މިއީ ބިރުދެއްކުމުގެ ހަމަލާއެއް ކަމަށާއި އެކަންކަމަކީ ބަލައިގަނެވޭނެ ކަމެއް ނޫން ކަމަށް ވިދާޅުވި އެވެ.
އަދި އިންތިހާއަށް އެހީއަށް ބޭނުންވެފައިވާ ގައްޒާގެ ރައްޔިތުންނަށް އެހީގެ ސާމާނު ހިފައިގެން ދަތުރު ކުރަމުންދިޔަ މަދަނީ ބަޔަކަށް ހަމަލާދީ، ހިސާރު ކުރުމަކީ އިންސާނިއްޔަތާ ދެކޮޅު ޖަރީމާއެއް ކަމަށާއި، ބައިނަލްއަގުވާމީ ގާނޫނުތަކާ ވެސް ހިލާފުކަމެއް ކަމުގައި އެ މަނިކުފާނު ސިފަ ކުރެއްވި އެވެ.
އިޒްރޭލުން ކެނޑިނޭޅި އިންސާނީ ކަރާމާތަށް އަރައިގަތުމުގައި އެއްވެސް ހައްދެއް ނެތް ކަމަށާއި، ރަހުމާއި ހަމްދަރުދީ އެއްފަރާތްކޮށް އިސްރާއީލުން ހިންގާ މި އަނިޔާވެރިކަމުގެ ސަބަބުން ބައިނަލްއަގުވާމީ މައިދާނުގައި އިޒްރޭލު ބާކީވެގެން ދާނޭ ކަމަށް ވެސް އެ މަނިކުފާނު ވިދާޅުވި އެވެ.
ރައީސް ޑރ. މުއިއްޒު ވަނީ، އިޒްރޭލުން ބައިނަލްއަގުވާމީ ގާނޫނުތަކާއި، ހަމަތަކާއި، އިންސާނިއްޔަތާއި ދެކޮޅަށް ކެނޑިނޭޅި ހިންގަމުންދާ ޖަރީމާތަކާއި މެދު ޖަވާބުދާރީ ކުރުވުމުގައި ބައިނަލްއަގުވާމީ މުޖުތަމައުން ހަރުދަނާ ފިޔަވަޅުތަކެއް އެޅުމަށް އެ މަނިކުފާނު ގޮވާލައްވާ ގޮވާލެއްވުން ތަކުރާރު ކުރައްވާފަ އެވެ.
ފަލަސްތީނުގެ ރައްޔިތުންގެ މިނިވަންކަމާއި، ހައްގުތައް ކަށަވަރު ކުރުމާއި، ސުލްހަ އާއި އަމާންކަން ހޯދުމުގައި ކުރަމުންދާ މަސައްކަތުގައި ދިވެހި ސަރުކާރު ސާބިތުކަމާއެކު ފަލަސްތީނުގެ ރައްޔިތުންނަށް އެންމެ ފުރިހަމައަށް އެއްބާރުލުން ދެމުން ގެންދާނެކަން ވެސް ރައީސް ތަކުރާރު ކުރައްވާފައިވެ އެވެ.
ކޮމެންޓް