މި އަހަރުގެ ކުރީކޮޅު ބާއްވަން ހަމަޖެއްސުމަށް ފަހު، ތިން ފަހަރެއްގެ މަތިން ފަސްކުރި 36 ވަނަ ގައުމީ ޤުރުއާން މުބާރާތް އަންނަ އާދިއްތަ ދުވަހު ފަށަން ތައްޔާރުވެއްޖެ އެވެ.

އިސްލާމިކް މިނިސްޓްރީގެ ދަށުން ހިންގަމުން އަންނަ ކީރިތި ޤުރުއާނާ ބެހޭ މަރުކަޒުން އިންތިޒާމުކޮށްގެން މުޅި ރާއްޖެ އަށް ހުޅުވާލައިގެން ބާއްވާ މުބާރާތުގައި ޖުމްލަ 1،020 މީހަކު ވާދަކުރެ އެވެ. އެގޮތުން މުބާރާތުގައި ބަލައިގެން ކިޔެވުމުގެ ގޮފީގައި 590 މީހުން ވާދަކުރާ އިރު، އަދި ނުބަލައި ކިޔެވުމުގެ ގޮފީގައި 430 މީހުން ވާދަކުރާނެ އެވެ.

މީގެ އިތުރުން ހާފިޒުންގެ ބައިގައި 15 ހާފިޒަކު ވާދަކުރެ އެވެ.

މުބާރާތް އާދިއްތަ ދުވަހު ފަށައި އަންނަ މަހުގެ 7 އާ ހަމައަށް ކުރިއަށް ދާނެ އެވެ.

މިި އަހަރުގެ މުބާރާޔް ހުޅުވައިލީ ސްކޫލުތަކުގެ ދަރިވަރުންނާއި، ޔުނިވަސިޓީތަކާއި، ކޮލެޖުތަކާއި، އިންސްޓިޓިއުޓްތަކާއި ޤުރްޢާން ކުލާސްތަކާއި، ޙާފިޒުންގެ އިތުރުން ކުލަބު ޖަމިއްޔާތަކަށެވެ.

ގައުމީ ޤުރުއާން މުބާރާތަކީ 1981 އިން ފެށިގެން އިސްލާމިކް މިނިސްޓްރީން ދީނީ ގޮތުން ބާއްވަމުން އަންނަ އެންމެ ބޮޑު ހަރަކާތެވެ.

އެންމެ ފަހުން 2022 ގައި 35 ވަނަ މުބާރާތުގައި 121 މުއައްސަސާއަކުން 1،022 ބައިވެރިން ވާދަކުރި އެވެ.