ފަނޑިޔާރުގެއަށް އަތް ބާނާ، ޖުޑިޝަރީއަށް ނުފޫޒު ފޯރުވީ ރައީސް ނަޝީދު: ލަތީފް

ފަނޑިޔާރުގެއަށް އަތް ބާނާ، ޖުޑިޝަރީއަށް އެންމެ ބޮޑަށް ނުފޫޒު ފޯރުވާފައިވަނީ ކުރީގެ ރައީސް މުޙައްމަދު ނަޝީދުގެ ސަރުކާރުން ކަމަށް ދިއްދޫ ދާއިރާގެ މެންބަރު އަބުދުއްލަތީފް މުޙައްމަދު ވިދާޅުވެއްޖެ އެވެ.

ފަނޑިޔާރުންގެ ގާނޫނަށް އިސްލާހު ގެނައުމުގެ ބިލަށް ރައްޔިތުންގެ މަޖިލީހުގައި މިއަދު ބަހުސް ކުރައްވަމުން ލަތީފް ވިދާޅުވީ ކޯޓުތަކުގައި ބޮޑުތަޅު އަޅުވައި ފަނޑިޔާރުންނާ ދިމާކޮށް، އެބޭފުޅުންނަށް އެންމެ ގިނަ ޖެއްސުން ކުރީ 2008 ވަނަ އަހަރު ކަމަށެވެ.

"ކޯޓު ތަކަށް އަތް ބާނާ ކޯޓު ތަކަށް ނުފޫޒު ފޯރުވީ ރައީސް ނަޝީދުގެ ސަރުކާރުން، ކޯޓުތައް ތަޅުލާ، ފަނޑިޔާރުންނަށް ޖެއްސުންކޮށް، ފުރައްސާރަކޮށް، ފަނޑިޔާރުންނާ ދިމާކޮށް، ފަނޑިޔާރުން މޫދަށް ވައްޓާލާ، ފަނޑިޔާރުން ބިންމައްޗަށް ވައްޓާލާ މި ހުރިހާ ކަމެއް ކުރީ 2008 ވަނަ އަހަރު،" ލަތީފް ވިދާޅުވި އެވެ.

އަދުލުއިންސާފުގެ ނިޒާމަށް ބާރާއި ނުފޫޒު ފޯރުވީ އޭރު އޮތް ސަރުކާރުން ކަމަށް ވިދާޅުވާ ވިދާޅުވުން ތަކުރާރު ކުރައްވަމުން ލަތީފް ވިދާޅުވީ އެކަން ނިމުކަމަށް ގެންނެވީ ރައީސް ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިތުމުން ކަމަށެވެ.

"މި އިސްލާހުގެ ސަބަބުން އަދުލު އިންސާފުގެ ނިޒާމަކީ ހަރުދަނާ ނިޒާމެއްގެ ގޮތުގައި ރައްޔިތުންނަށް ކަށަވަރު ކޮށްދޭނެ. ރައީސް މުއިއްޒު ބޭނުންފުޅު ވަނީ ރައްޔިތުންނަށް އަދުލު އިންސާފު ވީހާ ވެސް އަވަހަށް ލިބުން، އަދުލު އިންސާފު އަވަސް ކުރުމަށް ގާޒީންނަށް ދޭންޖެހޭ ހުރިހާ އިނާޔަތްތަކާއި ހިމާޔަތާއި ރައްކާތެރިކަމާ އަދި މަސައްކަތް ކުރާނެ މާހައުލެއް ގާއިމުކޮށްދެނީ މި އިސްލާހުގެ ސަބަބުން،" ލަތީފް ވިދާޅުވި އެވެ.

"ދިވެހިރާއްޖޭގެ ފަނޑިޔާރުންގެ ގާނޫނު" އަށް ގެންނަން ހުށަހެޅި އިސްލާހުގެ ބިލު މަޖިލީހަށް ހުށަހެޅުއްވީ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ އެވެ.