ހަނގުރާމަ ހުއްޓާލަން އީރާނާއި އިޒުރޭލުން އެއްބަސްވެއްޖެ

އީރާނާއި އިޒުރޭލާ ދެމެދު މިހާރު ކުރަމުން އަންނަ ހަނގުރާމަ ހުއްޓާލަން ދެ ގައުމުން ވެސް އެއްބަސްވެއްޖެ އެވެ.

އިޒުރޭލުން އިސްވެ އީރާނަށް ހަމަލާދޭން ފެށީ މިމަހުގެ 13 ވަނަ ދުވަހު އެވެ. އެ ހަމަލާތަކުގެ ރައްދުގައި އީރާނުން "ޓްރޫ ޕްރޮމިސް3" ގެ ނަމުގައި ހާއްސަ އަސްކަރީ ހަރަކާތެއް ފަށައި، އިޒުރޭލުގެ މުހިއްމު ތަންތަނަށް ވަނީ ބޮޑެތި ގެއްލުންތަކެއް ދީފަ އެވެ. އަދި ޔަހޫދީން ވެސް ދިޔައީ އީރާނަށް ހަމަލާ ދެމުންނެވެ.

ހަމަލާ ބަދަލު ކުރުން މެދުކަނޑައިލުމަށް ދެ ފަރާތުން އެއްބަސްވެފައިވާކަން ފުރަތަމަ އިއުލާނު ކުރެއްވީ އެމެރިކާގެ ރައީސް ޑޮނަލްޑް ޓްރަމްޕެވެ. އެހެންކަމުން އީރާނުން މިހާރު ވަނީ ހަމަލާ ދިނުން މެދުކަނޑައިލުމަށް ނިންމާފައިވާ ކަން އިއުލާނުކޮށްފަ އެވެ. އަދި އެއަށްފަހު، އިޒުރޭލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ ވެސް ވަނީ ޓްރަމްޕުގެ ހުށަހެޅުން ގަބޫލުކޮށް، ހަމަލާ ބަދަލު ކުރުން މެދުކަނޑައިލުމަށް ނިންމިކަން އިއުލާނު ކޮށްފަ އެވެ.

ނަމަވެސް މިކަމަށް އެއްބަސްވުމަށްފަހު ވެސް އީރާނުން އިޒުރޭލުގެ ރަށްތަކަށް އަމާޒުކޮށް ނުރައްކާތެރި މިސައިލް ހަމަލާތަކެއް ދީފައިވާ ކަމަށް ޔަހޫދީން ބުނެއެވެ. ޔަހޫދީން ބުނިގޮތުގައި އީރާންގެ ހަމަލާތައް އަމާޒު ކޮށްފައި ވަނީ އިސްރާއީލުގެ އުތުރުގެ ރަށްތަކަށެވެ.

އީރާނުން ރޭ ވެސް ވަނީ އިސްރާއީލުގެ ރަށްތަކަށް ނުރައްކާތެރި ޙަމަލާތަކެއްދީފަ އެވެ. އެ ހަމަލާތަކުގައި އިޒުރޭލުގެ 11 މީހުން މަރުވި އެވެ. އީރާނުގެ އެ ހަމަލާތައް އަމާޒުކޮށްފައިވަނީ ބިއުރު އަލް-ސަބައަށެވެ. މި ހަމަލާތަކުގައި ޔަހޫދީންގެ 20 މީހުން ޒަހަމުވި ކަމަށް ރިޕޯޓްތައް ބުނެ އެވެ.