ޑްރަގް ރިހެބިލިޓޭޝަން ސެންޓަރު ޤާއިމުކޮށް ހިންގުމަށް މެލޭޝިއާގެ ކުންފުންޏަކުން ޝައުގުވެރިކަން ފާޅުކޮށްފައިވާ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްއަށް ދެއްވި ޚާއްޞަ އިންޓަވިއުއެއްގައެވެ.

މަސްތުވާތަކެތީގެ ވަބާގައި ޖެހިފައިވާ މީހުންނަށް ދަރުވާދިނުމަށް ރިހެބިލިޓޭޝަން ސެންޓަރުތައް ޤާއިމުކޮށް ހިންގުމުގެ ފުރުޞަތު އަމިއްލަ ފަރާތްތަކަށް ސަރުކާރުން ހުޅުވާލީ މިއަހަރުގެ ޖެނުއަރީ މަހުގައެވެ. މިއީ މަސްތުވާތަކެއްޗާބެހޭ ޤާނޫނުގެ ދަށުން ހުޅުވާލި ފުރުޞަތެކެވެ.

ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވީ، މެލޭޝިއާގެ ކުންފުންޏަކުން ރާއްޖޭގައި ޑްރަގް ރިހެބިލިޓޭޝަން ސެންޓަރު ހެދުމަށް ޝައުގުވެރިކަން ފާޅުކޮށް ޕްރޮޕޯސަލް ހުށަހަޅާފައިވާ ކަމަށެވެ. އެ ކުންފުންޏަކީ ދުނިޔޭގެ އެހެން ޤައުމުތަކުންވެސް ފަރުވާ ހޯދުމަށް ގިނަބަޔަކު ދާ ސެންޓަރުތައް ހިންގަމުން އަންނަ ކުންފުންޏެއް ކަމަށްވެސް ވިދާޅުވިއެވެ.

ވަޒީރު ވިދާޅުވީ ޕްރޮޕޯސަލް ހުށަހެޅި ކުންފުނިން ހުށަހަޅާފައިވަނީ ބޮޑު އަގެއް ކަމަށެވެ. އެހެންކަމުން، އެ ޚިދުމަތް ދިނުމުގައި އިތުރު ގޮތްތައް ބަލަމުންދާ ކަމަށާއި މިހާރު އެ ޕްރޮޕޯސަލާ ގުޅިގެން މަޝްވަރާތައް ކުރަމުންދާކަމަށްވެސް ވަޒީރު ވިދާޅުވިއެވެ.

"ރާއްޖޭގައި މަސްތުވާތަކެއްޗަށް ގޮސް، އޭގަ ދެވިހިފާފައި މިތިބޭ ގިނަ މީހުންނަކީ އެހާ ފޯރުންތެރި މީހުންނެއް ނޫން. އެހެންވެ އަޅުގަނޑުމެން އެބަބަލަން މިއަށް ކިހިންތެތޯ ހައްލެއް ލިބޭނީ. ނޭޝަނަލް ޑްރަޖް އެޖެންސީގެ ބަޖެޓުން ނުވަތަ އާސަންދަ ކަހަލަ ފަރުވާދޭ މެކޭނިޒަމެއް މެދުވެރިކޮށްވެސް މިއީ އޮޕްޝަނެއްތޯ ބަލަމުން މިހާރު މިދަނީ." ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވިއެވެ.

ދާޚިލީ ސަލާމަތާބެހޭ ވަޒީރު ވިދާޅުވީ، އަމިއްލަ ފަރާތްތަކުން ޑްރަގް ރިހެބިލިޓޭޝަން ސެންޓަރުގެ ޚިދުމަތް ދިނުމަކީ އެކަމުގެ ސަބަބުން ވާދަވެރިކަން އިތުރުވެ، ޚިދުމަތުގެ ފެންވަރު ރަނގަޅުވާނެ ކަމެއް ކަމަށެވެ. އަދި ކުޑަ ދުވަސްކޮޅެއްގެ ތެރޭގައި އަމިއްލަ ފަރާތްތަކުން ރާއްޖޭގައި ޚިދުމަތް ދޭން ފަށާނެ ކަމަށް އުއްމީދު ކުރައްވާކަމަށްވެސް ވަޒީރު ވިދާޅުވިއެވެ.

ނޭޝަނަލް ޑްރަގް އެޖެންސީން ހުޅުވާލި ފުރުޞަތުގެ ދަށުން ޤާއިމުކުރާ ރިހެބިލިޓޭޝަން ސެންޓަރުތަކުގައި މަސްތުވާތަކެތީގެ ވަބާގައި ޖެހިފައިވާ މީހުންނަށް ފަރުވާ ދިނުމަށް ގިނަ ޚިދުމަތްތަކެއް އެ ސެންޓަރުތަކުން ފޯރުކޮށްދޭން ޖެހެއެވެ.

އެގޮތުން، އައުޓްޕޭޝަންޓް ޑީޓޮކްސިފިކޭޝަން ޚިދުމަތާއި، ސައިކޭޓްރިކް އިވެލުއޭޝަނާއި، ކައުންސެލިން ޚިދުމަތާއި، ސައިކޯ-ސޯޝަލް ތެރަޕީއާއި ޑްރަގް ޓެސްޓް ކުރުމާއި، ސައިކޮލޮޖިކަލް އެސެސްމަންޓް ހެދުމުގެ ޚިދުމަތް މި ސެންޓަރުތަކުން ފޯރުކޮށްދޭންޖެހެއެވެ.