ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އިއުލާން ކުރައްވާފައިވާ ފަސް މިލިއަން ގަސް ޕްރޮގްރާމްގެ ތެރެއިން ފަސް ލައްކަ ގަސް އިންދުމުގެ ހަރަކާތެއް ސްޓެލްކޯއިން ފަށައިފި އެވެ.
ފަސް މިލިއަން ގަސް ޕްރޮގްރާމަކީ ރައީސް މުއިއްޒުގެ ވައުދުފުޅެކެވެ.
ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ މިއަދު ކުރެއްވި އެކްސް ޕޯސްޓެއްގައި ވިދާޅުވީ ސްޓެލްކޯއިން ހިދުމަތްދޭ ރަށްރަށުގައި ހަފްތާ ބަންދުތަކުގައި ގަސް އިންދުމުގެ ހަރަކާތްތަކެއް ހިންގަމުން އަންނަ ކަމަށެވެ. އަދި މާތްﷲގެ އިރާދަފުޅާއެކު ރައީސްގެ ވައުދު ފުއްދުމަށް ސްޓެލްކޯއިން އަމާޒު ހިފާފައިވާ ގޮތައް ފަސްލައްކަ ގަސް އިންދިގެން ދާނެ ކަމަށް ފަހުމީ ވިދާޅުވި އެވެ.
ފަސް މިލިއަން ގަސް އިންދުމަށް އަމާޒުކޮށް ރައީސް ވެވަޑައިގެންފައިވާ ވައުދު ފުރިހަމަ ކުރުމަށް، ސްޓެލްކޯއިން އެއްބަސްވެފައިވާ ގޮތަށް ފަސް ލައްކަ ގަސް އިންދުމުގެ އަމާޒަށް ވާސިލުވުމަށް ޓަކައި ގިނަ މަސައްކަތްތަކެއް އެ ކުންފުނިން އަންނަނީ ކުރަމުންނެވެ.
ފަސް އަހަރު ތެރޭ ފަސްލައްކަ ގަސް އިންދުމަށް ސްޓެލްކޯއިން ހިންގާ ހަރަކާތް މިދިޔަ އަހަރު ފެށީ ކ. ތުލުސްދޫގަ އެވެ.
ފަސް މިލިއަން ގަސް ޕްރޮގްރާމްގެ ތެރެއިން ޖުމުލަ 90 ބާތެއްގެ ގަސް އިންދުމަށް ހަމަޖެހިފައިވެ އެވެ.
ކޮމެންޓް