އަރުމޭނިއަން ޔޫތު އޯޕަންގައި ވާދަކޮށް، ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަހުމަދު މަހްލޫފް (އެލީ) ހޯދި ކާމިޔާބީއަށް މުޅި ގައުމު ފަހުރުވެރިވާ ކަމަށް ނައިބު ރައީސް ހުސެއިން މުޙައްމަދު ލަތީފް ވިދާޅުވެއްޖެ އެވެ.
އުމުރުން 12 އަހަރުގެ ލައިބާ ވަނީ "އަރުމޭނިއަން ޔޫތު އޯޕަން 2025"ގައި ތިން ކެޓަގަރީއަކުން ރަން މެޑެލް ހޯދާފަ އެވެ. 2022 ވަނަ އަހަރުން ފަށައިގެން ބައިނަލްއަގުވާމީ މުބާރާތްތަކުގައި ވާދަ ކުރަމުން އަންނަ ލައިބާއަށް މިއީ ބައިނަލްއަގުވާމީ ފެންވަރުގެ މުބާރާތަކުން ރަން މެޑެލް ހާސިލު ކުރެވުނު ފުރަތަމަ ފަހަރެވެ.
ލައިބާ ހޯދި ފަހުރުވެރި ކާމިޔާބީއަށް މަރުހަބާ ދަންނަވާ ނައިބު ރައީސް ކުރެއްވި އެކްސް ޕޯސްޓެއްގައި ވިދާޅުވީ ބައިނަލްއަގުވާމީ މުބާރާތެއްގައި މުޅި ގައުމު ތަމްސީލުކޮށް ތިން ރަން މެޑެލް ހާސިލު ކުރުމަކީ މުޅި ގައުމު ފަހުރުވެރިވާ ކަމެއް ކަމަށެވެ.
އަދި މިއީ އެކި ދާއިރާތަކުން، ހާއްސަކޮށް ކުޅިވަރުގެ ދާއިރާއިން ކުރިއަށް ގޮސް މި ފަދަ ރަން ވަނަތައް ހާސިލު ކުރަން ބޭނުންވާ ކުދިންނަށް ލިބުނު ހިތްވަރެއްކަން ނައިބު ރައީސް ފާހަގަ ކުރެއްވި އެވެ.
އޭގެ އިތުރުން ނައިބު ރައީސް ވަނީ ލައިބާއަށް އިތުރު ކާމިޔާބީއާއި ރަން ވަނަ ތަކަށް އެދިވަޑައިގަންނަވާފަ އެވެ.
"ލައިބާއަށް އިތުރު ކާމިޔާބީއާއި ރަން ވަނަތަކަށް އެދެން، އަދި ހިތްވަރާއެކު ކުރިއަށް ދިއުމަށް ހިތްވަރުދެން،" ނައިބު ރައީސްގެ ޕޯސްޓުގައި ބުންޏެވެ.
އަރްމީނިއަން ޔޫތު އޯޕަންގައި ވާދަކޮށް ލައިބާ ހޯދި ކާމިޔާބީއަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވެސް ވަނީ މަރުހަބާ ދަންނަވާފަ އެވެ. ރައީސް ވިދާޅުވެފައިވަނީ ލައިބާއަކީ ކުޅިވަރުގައި ރަނގަޅު މުސްތަގުބަލެއް ހޯދަން މަސައްކަތްކުރާ ކޮންމެ ކުއްޖަކަށް ނަމޫނާއެއް ކަމަށެވެ.
ކޮމެންޓް