މުޅި ކުޅުދުއްފުށީގެ ފެނުގެ ހިދުމަތް އިޔާދަކުރަނިވި ހަކަތައަށް ބަދަލު ކުރުމުގެ އެއްބަސްވުމެއްގައި ޖަޕާނުގެ ކުންފުންޏަކާއެކު މާލޭ ވޯޓާ އެންޑް ސްވަރޭޖް ކޮމްޕެނީ، (އެމްޑަބްލިއުއެސްސީ) އިން ސޮއިކޮށްފި އެވެ.
މި މިއެއްބަސްވުމުގައި ސޮއިކުރުމަށް އިއްޔެ މީރުމާ ހޮޓަލުގައި ބޭއްވި ރަސްމިއްޔާތުގައި އެމްޑަބްލިޔުއެސްސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރު އަބްދުލް މަތީން މުޙައްމަދު އެވެ. ޖަޕާނުގެ ކެނޭޑިވިއާ ކޯޕަރޭޝަނުން ސޮއި ކުރެއްވީ އެ ކުންފުނީގެ ޖެނެރަލް މެނޭޖަރު ޓަކޭޝީ އައިބާ އެވެ.
މި އެއްބަސްވުމުގެ ދަށުން ދުވާލަކު 500 ކިއުބިކް މީޓަރުގެ ފެން އުފައްދައިދޭ އާރޯ ޕްލާންޓަކާއި 500 ކިލޯވޮޓުގެ އަވިން ހަކަތަ އުފައްދާ ސިސްޓަމެއް ގާއިމު ކުރުމުގެ އިތުރުން 1450 ކިލޯވޮޓުގެ ބެޓަރި ސިސްޓަމެއް ބަހައްޓާނެ އެވެ.
މިމަޝްރޫއުގެ ޖުމުލަ ހަރަދުގެ ތެރެއިން 46 ޕަސެންޓު ހަރަދު ކުރާނީ އެމްޑަބްލިއުއެސްސީންނެވެ. އަދި 27 ޕަސެންޓު ޖަޕާނުގެ ގްލޯބަލް އެންވަޔަރަންމަންޓް ސެންޓާ ފައުންޑޭޝަނުން ހިލޭ އެހީގެ ގޮތުގައި ދޭއިރު، ކެނެޑޭވިއާ ކޯޕަރޭޝަނުން 27 ޕަސެންޓް ހަރަދު ކުރާނެ އެވެ.
އެމްޑަބްލިޔުއެސްސީން ބުނީ މިމަޝްރޫއުން ތިމާވެއްޓަށް ލިބޭ ގެއްލުން ކުޑަކުރެވި ދެމެހެއްޓެނިވި ގޮތެއްގައި ފެން އުފެއްދުމުގެ ނިޒާމުތަކެއް ރަށްރަށުގައި ގާއިމު ކުރެވޭނެ ކަމަށެވެ. އަދި ރާއްޖެއަށް ތެޔޮ އެތެރެކުރާ މިންވަރު މަދުކޮށް، ކުންފުނީގެ ޔުޓިލިޓީ ހިދުމަތްތަކުގެ އިތުރުން އޮޕަރޭޝަންތައް ވެސް ތިމާވެއްޓާ ރަށްޓެހި ގޮތަށް ބަދަލު ކުރުމަށް ވެސް މި މަޝްރޫއުން މަގުފަހިވެގެންދާ ކަމަށް އެ ކުންފުނިން ބުންޏެވެ.
ކޮމެންޓް