ރައްޔިތުންގެ ހާލަތު ދެނެގަނެ، ގާތުން ހިދުމަތް ފޯރުކޮށްދިނުމުގެ ގޮތުން ސަރުކާރުން ފެށި "ހާލު ކިހިނެއް" ޕްރޮގްރާމުގެ ދަށުން 200 އަށް ވުރެ ގިނަ އާއިލާއާ ބައްދަލުކޮށްފިއެވެ.

ޕީއެސްއެމްގެ ރާއްޖެ މިއަދު ޕްރޮގްރާމުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. އައިޝަތު ޝިހާމް ވިދާޅުވީ، އެ ވުޒާރާ އިން ދާ ކޮންމެ ގެއަކުން ވެސް، ކޮންމެ އާއިލާއަކުން ވެސް ބަލައިގަންނަ ގޮތާއި، އެ އަދާކުރައްވާ މެހެމާންދާރީއާ ހިތްހެޔޮކަން އެއީ މި މަސައްކަތުގައި އެންމެ މުހިންމު ކަންތައް ކަމަށެވެ. އަދި އޭގެ ކާމިޔާބީއަކީ ވެސް އެއީ ކަމަށް ވިދާޅުވިއެވެ.

ވަޒީރު ވިދާޅުވީ އެ ޕްރޮގްރާމުގެ ތެރެއިން އާއިލާތަކަށް ބޭނުންވާ ބައެއް މައުލޫމާތުތައް ވެސް އެ ވުޒާރާ އިން ފޯރުކޮށްދީފައިވާ ކަމަށެވެ.

"އެގޮތަށް ބައްދަލުވެގެންދާއިރު މި ފާހަގަކުރެވީ ސަރުކާރުގެ ތެރޭގައި ވެސް އަމިއްލަ ކުންފުނިތަކުގައި ވެސް ކަންތައްތައް ހިންގާ ގޮތުގެ މައުލޫމާތު އެ އާއިލާތަކާއި އެބަ ހިއްސާ ކުރެވޭ. މިސާލަކަށް ޤާނޫނީ ގޮތުން ކަމަކަށް އެދޭ ހިނދު ކޮންކަހަލަ ފޯމްތަކެއްތޯ ފުރާނީ، އެ ހޯދާނީ ކޮންތާކުންތޯ،" ވަޒީރު ވިދާޅުވިއެވެ.

ހިދުމަތްތައް ގުޅުވާލެވޭ ކަހަލަ މަސައްކަތްތަކެއް އެކަމުން ކުރެވޭ ކަމަށާއި އެންމެ ގިނައިން އާއިލާތަކުން ފާހަގަކުރީ، ހުރި ދަތިތަކުގެ ވާހަކަ ކަމަށް ވަޒީރު ވިދާޅުވިއެވެ.

އެގޮތުން ބޯހިޔާވަހިކަމުގެ މައްސަލައާ ވަޒީފާ ނުލިބުމުގެ މައްސަލަތައް ވެސް އަންނަ ކަމަށް ވިދާޅުވިއެވެ. ރައްޔިތުން ހާލަތަށް ކެތްތެރިވާ މިންވަރާއި ޝުކުރުވެރިވާ މިންވަރު އެނގިގެން ދިޔަ ކަމަށާއި ހާލަތުން އަރައިގަތުމަށް މަސައްކަތް ކުރާ މިންވަރު ވެސް ފެނިގެންދިޔަ ކަމަށް ވަޒީރު ވިދާޅުވިއެވެ.