މާލޭގައި ފުލުހުން ހިންގި އޮޕަރޭޝަނެއްގައި ގިނަ އަދަދެއްގެ ފައިސާއާއާއި ދެ ކިލޯއާ ގާތްކުރާ އަދަދެއްގެ މަސްތުވާތަކެއްޗާ އެކު 6 މީހަކު ހައްޔަރުކޮށްފި
ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި މި އޮޕަރޭޝަންގައި ހައްޔަރުކޮށްފައިވަނީ ގއ. ދާންދޫ ބޯގަންވިލާ، ހަސަން އަލީ، 26 އާއި ޅ. ކުރެންދޫ މެދުރިގެ، މުޙައްމަދު އަލީޝް އަހުމަދު، 28، އާއި ހދ. ނޮޅިވަރަންފަރު ސާރާޒް، ވަލީދު މުޙައްމަދު، 26، އާއި ސ. ފޭދޫ ފެނިގެއްލިދާގެ، ޖައިލަމް މުޙައްމަދު ޒަކީ، 28، އާއި ފ. ދަރަނބޫދޫ ނާރެސް، ޝަޔާން އިސްމާއީލް ވަހީދު، 18،ގެ އިތުރުން އއ. ތޮއްޑޫ ތުނޑި، އިބްރާހީމް މައިޝަމް މާހިރު، 21، އެވެ.
ފުލުހުންގެ ވެބްސައިޓުގައިވާ ގޮތުން މި މަހުގެ 13 އަދި 14 ވަނަ ދުވަހު ޑުރަގު އެންފޯސްމަންޓާއި ކައުންޓާ ނާކޮޓިކްސް އިންޓެލިޖެންސް ގުޅިގެން ހިންގި މި އޮޕަރޭޝަނުގައި މާލެއާއި ހުޅުމާލެ ހިމެނޭ ގޮތަށް 7 ތަނެއް ބަލައި ފާސްކޮށް، އެ ތަންތަނުން ހެރޮއިން އާއި މެތަމްފެޓަމިން އަދި ކެނަބިސް ހިމެނޭ ގޮތުން މަސްތުވާތަކެތި ކަމަށް ޝައްކު ކުރެވޭ ތަކެތި ފެނިފައިވެ އެވެ. މި ތަކެތީގެ ވަގުތީ ބަރުދަނަކީ 1943.76 ގުރާމެވެ.
މީގެ އިތުރުން، ނިކޮޓިން- ސްޓައިލް ވޭޕް ކާޓްރިޖު ތަކާއި، "މޫންޝައިން" ކެނަބިސް ބުއިން ތަކާއި ފްލޭވާ ކުރެވިފައިވާ ތެޔޮ، އަތުލައިގެންފައިވާއިރު، 90،000 އަށްވުރެ، ގިނަ ދިވެހި ރުފިޔާ އާއި 3،605 އެމެރިކާ ޑޮލަރު އަދި 6 މޯބައިލް ފޯނާއި 2 ލެޕްޓޮޕް ވެސް ފުލުހުންގެ ބެލުމުގެ ދަށަށް ގެނެސްފައިވެ އެވެ.
މައްސަލައިގައި ހައްޔަރު ކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ޖައިލަމް މުޙައްމަދު 5 ދުވަހަށް، އިބްރާހީމް މައިޝަމް އާއި ޝަޔާން އިސްމާއީލް 10 ދުވަހަށް އަދި ހަސަން އަލީ އާއި މުޙައްމަދު އަލީޝް އާއި ވަލީދު މުޙައްމަދު، 15 ދުވަހަށް ބަންދު ކުރުމަށް އަމުރުކޮށްފައިވާ ކަމަށް ވެސް ފުލުހުން ބުނެފައިވެ އެވެ.
ކޮމެންޓް