ނުކުޅެދުންތެރިކަން ހުންނަ ކުދިން ބަލަހައްޓާ ބެލެނިވެރީންނަކީ ވަރަށް ހިތްވަރު ގަދަ ބައެއް ކަމަށް އިޖުތިމާއީ އަދި އާއިލީ ތަރައްގީއާ ބެހޭ ވަޒީރު، ޑރ އައިޝަތު ޝިހާމް ވިދާޅުވެއްޖެ އެވެ.
އެ ކަމަނާ މިހެން ވިދާޅުވީ އިސްރަށްވެހީންގެ ތެރެއިން ދާންމަތިވެފައިވާ މީހުންގެ ގާތަށް ޒިޔާރަތް ކުރުމުގެ ގޮތުން ފަށާފައިވާ "ބެޑްރިޑަން ޕްރޮގްރާމް" ފުރަތަމަ ބެޗުގެ ބައިވެރީންނާ މިއަދު ބައްދަލު ކުރައްވައި ދެއްކެވި ވާހަކަފުޅުގަ އެވެ.
މިނިސްޓަރުގެ ވާހަފުޅުގައި ވަނީ ނުކުޅެދުންތެރިކަން ހުންނަ ކުދީން ބަލަހައްޓާ ބެލެނިވެރީންގެ ފަރާތުން ފެންނަ އޯގާތެރި ކަމާއި ކެތްތެރިކަން ފާހަގަކޮށް، އެ ފަރާތް ތަކަށް ހިތްވަރު ދެއްވާފަ އެވެ. އަދި މަމްސް އެއިޑާ އެކު މި ފެށި ސަޕޯޓް ގުރޫޕުތަކުގެ އެހީގައި ނުކުޅެދުންތެރިކަން ހުންނަ ފަރާތްތައް ބަލަހައްޓަމުންދާ ފަރާތްތަކުގެ ނަފުސާނީ ދުޅަހެޔޮކަން އިތުރުވެ، އުފާވެރިކަމާ އެކު ދިރިއުޅުން ބައްޓަން ކުރުމަށް ބޭނުންވާ ހުނަރުތައް ލިބިގެންދާނެ ކަމަށް އެ ކަމަނާ ވަނީ ވިދާޅުވެފަ އެވެ.
އޭގެ އިތުރުން މި ހިތްވަރު ގަދަ ބެލެނިވެރީންގެ ފަރާތުން އެކަކު އަނެކަކަށް ހިއްސާ ކުރާ ތަޖުރިބާ ތަކުގެ އަލީގައި މި ކުރެވޭ މަސައްކަތް ތަކަކީ އަމިއްލަ ނަފުސަށް ފަހުރުވެރިވާން ޖެހޭ އަގުހުރި ހިދުމަތެއް ކަމުގެ އިހުސާސް ކުރެވި، ދުވަސް ހެޔޮ ގޮތުގައި ރާވާލުމުގައްޔާއި ކުދިން ބެލެހެއްޓުމުގައި ސަޕޯޓް ސިސްޓަމެއް އުފެދިގެންދާނެ ކަމަށް ވެސް މިނިސްޓަރު ވަނީ ފާހަގަ ކުރައްވާފަ އެވެ.
ކޮންމެ ގުރޫޕަކާ އެކު ޖުމުލަ 13 ބައްދަލުވުން ބޭއްވުމަށް ހަމަޖެހިފައިވާ ކަމަށާއި، މި ބައްދަލުވުންތައް ކޮންމެ ހަފުތާއެއްގެ ދެ ދުވަހު އޮންނާނެ ކަމަށް އެ ކަމަނާ ވިދާޅުވި އެވެ.
އަދި އުންމީދަކީ، މި ސަޕޯޓް ގުރޫޕުތަކުގެ ސަބަބުން، ހުރިހާ ބައިވެރީންގެ ނަފުސާނީ ދުޅަހެޔޮ ކަމަށް ކުރިއެރުން ތަކެއް ލިބި، އެކަނިވެރިކަން ފިލައިގެންދާނެ ކަމެއްގެ ގޮތުގައި މި ސަޕޯޓް ގުރޫޕުތައް ވެގެން ދިއުންކަން ވެސް މިނިސްޓަރު އައިޝަތު ޝިހާމްގެ ވާހަފުޅުގައި ފާހަގަ ކުރެއްވި އެވެ.
ކޮމެންޓް