އުއްތަމަ ފަނޑިޔާރު އަހުމަދު މުއުތަސިމް އަދުނާން އެ މަގާމުން ރިޓަޔާ ކުރެއްވުމަށް ހުށަހަޅުއްވައިފި އެވެ.
"ދެލި"އަށް އެނގިފައިވާ ގޮތުގައި މުއުތަސިމް ވަނީ ރިޓަޔާ ކުރެއްވުމަށް އެދި ޖުޑީޝަލް ސާވިސް ކޮމިޝަން (ޖޭއެސްސީ) އަށާއި ސުޕްރީމް ކޯޓުގެ އިދާރާއަށް މިއަދު ސިޓީ ފޮނުއްވަވާފަ އެވެ.
މުއުތަސިމް، ރިޓަޔާ ކުރައްވަން މިއަދު ހުށަހެޅުއްވިއިރު، މީގެ ދުވަސްކޮޅެއް ކުރިން އެ މަނިކުފާނު ވަނީ އެ މަގާމުން ރިޓަޔާ ކުރައްވަން ވިސްނަވާ ކަމުގެ އިޝާރާތެއް ކުރައްވާފަ އެވެ.
ވަކީލުކަމާ އަލަށް ގުޅުނު ވަކީލުން ހުވާކުރުމަށް ފެބުރުއަރީ މަހުގެ 17 ވަނަ ދުވަހު ބޭއްވި ރަސްމިއްޔާތުގައި އުއްތަމަ ފަނޑިޔާރު ވިދާޅުވީ، އެ މަނިކުފާނަކީ ދުވަސްވީ ބޭފުޅެއް ކަމަށެވެ. އެހެންކަމުން އެ ފަދަ ޖަލްސާ ތަކުން ކުރިއަށް އޮތް ތަނުގައި ނުފެނުމަކީ އެކަށީގެންވާ ކަމެއް ކަމަށެވެ.
"އަޅުގަނޑަކީ މިހާރު ދުވަސްވީ މީހެއް. ހަމަ އެކަށީގެންވާ ކަމެއް މިފަދަ ޖަލްސާއަކުން މި ހައިސިއްޔަތުން ދެން ނުފެނުމަކީ ވެސް،" މުއުތަސިމް، ވިދާޅުވި އެވެ.
އުއްތަމަ ފަނޑިޔާރު އަހުމަދު މުއުތަސިމް، އަކީ ޝަރުއީ ދާއިރާގައި 32 އަހަރު ހިދުމަތް ކުރެއްވި ބޭފުޅެކެވެ.
ކޮމެންޓް