ހުސްގޮނޑިއަކީ ރައީސް ޔާމީނަށް ބެހެއްޓި ގޮނޑިއެއް ނޫން ކަމަށާއި އެއީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއަށް ބެހެއްޓި ގޮނޑިއެއް ކަމަށް ދިއްދޫ ދާއިރާގެ މެންބަރު އަބްދުއްލަތީފް މުޙައްމަދު ވިދާޅުވެއްޖެ އެވެ.
ދެހާސް ތޭވީސް ވަނަ އަހަރު ބޭއްވި ރިޔާސީ އިންތިހާބު، ރައީސުލްޖުމްހޫރިއްޔާ ޑރ. މުޙައްމަދު މުއިއްޒަށް ކާމިޔާބު ކުރެއްވުނީ ރައީސް ޔާމީނަށް ހާއްސަކޮށްގެން ބެހެއްޓި ހުސްގޮނޑި ދައްކައިގެން ކަމުގައި ވަރަށް ގިނަ ބަޔަކު ގަބޫލު ކުރެ އެވެ.
ޕީއެންސީން ރޭ ބޭއްވި ޖަގަހަ ޖަލްސާގައި ވާހަކަދައްވަމުން، ހުސް ގޮނޑިއަކީ ސީދާ އަބްދުއްރަހީމަށް ބެހެއްޓި ގޮނޑިއެއްކަން ފާހަގަ ކުރައްވަމުން ލަތީފް ވިދާޅުވީ އެ ގޮނޑި އަދުރޭ ހަދިޔާ ކުރެއްވި ބޭފުޅަކަށް ހަދިޔާ ކުރެއްވީ ކަމަށާއި އެކަން އެނގިވަޑައިނުގަންނަވާ ކަމަށެވެ.
"ހުސްގޮނޑިއަކީ، އަބްދުއްރަހީމަށް ޖަލްސާގައި ބައިވެރިވާން އާދެވެނީ ޕާޓީގެ މަސައްކަތް ތަކެއް ހުރީމަ ތަންކޮޅެއް ފަހުން، އެހެންވީމަ އެ މަނިކުފާނަށް ބެހެއްޓި ގޮނޑިއެއް އެއީ، ކީއްވެގެން އޮޅުވާލަނީ، ބަޔަކު އުޅެނީ ރަންބުއްދިވެގެން، އެ ގޮނޑި ބެހެއްޓުމުގެ މަސައްކަތް އަޅުގަނޑާއެކު ކުރި ޗެއާ މުޙައްމަދު އިސްމާއީލް، ޝާޑު، ނިމާލް، އަދި ޝިޔާމް، މިތިބީ، އެ ހުރިހާ ބޭފުޅުންނަށް މިކަން އެނގޭނެ، ލަތީފް ވިދާޅުވި އެވެ.
ރައީސް މުއިއްޒަށް ނިސްބަތްކޮށް، އެންމެ ގިނައިން ދެކޮޅު ވާހަކަދައްކާ ބޭފުޅަކީ އެންމެންގެ އިހުތިރާމާ ލޯބި އެއްއިރެއްގައި އޮތް ރައީސް ޔާމީން ކަމަށް ލަތީފް ވިދާޅުވި އެވެ. އަދި ޕީއެންސީގެ މެންބަރުންނަކީ ރައީސް ޔާމީނަށް ލިބެމުންދިޔަ ވޭނާއި އަނިޔާ ތަކުން ސަލާމަތް ކޮށްދިނުމަށް ޓަކައި ވަރަށް ތެދުވެރި ކަމާއެކު މަސައްކަތް ކޮށްދިން ބޭފުޅުން ކަމަށް ވެސް އޭނާ ވިދާޅުވި އެވެ.
"އެހެންވީމަ މި ހުސްގޮނޑީގެ މައްސަލަ މިއަދުން ފެށިގެން ހައްލުވީ ކަމަށް އަޅުގަނޑު މި ބެލީ، މި ވާހަކަ ދެން މި ހިސާބުން ނުދައްކާނެ ކަމަށް އަޅުގަނޑު ގަބޫލު ކުރަނީ، ލަތީފް ވިދާޅުވި އެވެ.
މިއަދު ފެންނަނީ ޕާޓީގެ ލީޑާޝިޕާ މުހާތަބުކޮށް، ހިތަށް އެރި އެއްޗެއް ބުނެލާ މަންޒަރުކަން ފާހަގަ ކުރައްވަމުން ރައީސް ޔާމީނަށް ލަތީފް، ގޮވާލެއްވީ އެ ކަން ހުއްޓާލުމަށްފަހު، އެހެން ކޮންމެވެސް ކަމަކާ އުޅުއްވުމަށެވެ.
ކޮމެންޓް