ސުވަރުގެ ހަރާމް ވާނެ މީހުން ކަނޑައެޅުމަކީ ސިޔާސީ ވާހަކައެއް ނޫން: ޝަކީލް

ސުވަރުގެ ހަރާމް ވާނެ މީހުން ކަނޑައެޅުމަކީ ސިޔާސީ ވާހަކައެއް ނޫން ކަމަށް މޯލްޑިވްސް ހައްޖު ކޯޕަރޭޝަން ލިމިޓެޑްގެ މެނޭޖިން ޑިރެކްޓަރު މުޙައްމަދު ޝަކީލް ވިދާޅުވެއްޖެ އެވެ.

ޝަކީލް މިހެން ވިދާޅުވީ، ޕީއެންއެފުން ރޭ ބޭއްވި ޖަލްސާއެއްގައި ކުރީގެ ނައިބު ރައީސް ޑރ. މުޙައްމަދު ޖަމީލް އަހުމަދު އާއި އެ ޕާޓީގެ މެންބަރަކު، ރައީސް މުއިއްޒަށް ނިސްބަތްކޮށް، ދެއްކި ކުފުރުވާ ފަދަ ވާހަކަ ވާހަކަތަކާ ގުޅުވައިގެންނެވެ.

އެ ޖަލްސާގައި ޖަމީލް ވަނީ ރައީސް މުއިއްޒަށް ސުވަރުގެ ހަރާމްވާނެ ކަމަށް ބުނެ، ފަތުވާއެއް ނެރެފަ އެވެ.

ޖަމީލްގެ ވާހަކަ އާ ގުޅުވައިގެން ޝަކީލް ކުރެއްވި އެކްސް ޕޯސްޓެއްގައި ވިދާޅުވީ ގޭގެ ސިޓިން ރޫމްގައި ތިބެ ލައިވް ޓީވީގައި ސިޔާސީ ހަރަކާތުގެ ނަމުގައި ފިތުނަ ފަތުރަމުން ސުވަރުގެ ހަރާމް ވާނެ މީހުން ކަނޑައެޅުމަކީ ސިޔާސީ ވާހަކައެއް ނޫން ކަމަށެވެ.

ޝަކީލް ވިދާޅުވި ގޮތުގައި އެއަށް ކިޔަނީ ވެރިކަމުގެ ޖާހަތަށް ދަހިވެތިވެ، ހަމަ ބުއްދި ފިލައިގެން ދިޔުމެވެ.

އެމްޑީ ޝަކީލް އިތުރަށް ވިދާޅުވީ ރައީސް ޑރ. މުއިއްޒާ ދެކޮޅަށް ދެއްކޭނެ ވާހަކައެއް ނެތުމުން، ރާއްޖޭގެ ސިޔާސީ މަޝްރަހުން ފެއިލްވެފައި ތިބި މީހުން ނުކުމެ، މިހާ ދަށު ދަރަޖަ އަށް ވެއްޓުމުން ބަދުނާވުމުން ފިޔަވާ އިތުރު މޮޅު ތަކެއް ނުވާނެ ކަމަށެވެ.

"އަދުގެ ރައީސުލްޖުމްހޫރިއްޔާ ޑރ. މުއިއްޒާ ދެކޮޅަށް ދެއްކޭނެ ވާހަކައެއް ނެތުމުން ރާއްޖޭގެ ސިޔާސީ މަސްރަހުގައި އިތުބާރު ގެއްލިފައިތިބި މީހުން ނިކުމެ، މި ފެންވަރަށް ވެއްޓުމުން ރައްޔިތުން ކުރިމަތީގައި އިތުރަށް ބަދުނާމުވުން ނޫން ކަމެއް ނުވާނެ،" ޝަކީލް ވިދާޅުވި އެވެ.

އެ ޖަލްސާގައި ރައީސް މުއިއްޒު އާ ގުޅުވައިގެން ދެއްކި ވާހަތައް ކުށްވެރިކޮށް މީސް މީޑިއާގައި ގިނަ ބަޔަކު އަންނަނީ ނުރުހުމުގެ ބަސްތައް ރައްދު ކުރަމުންނެވެ.

ޝުއޫރު ފައުޅު ކުރި ބައެއް މީހުން ބުނި ގޮތުގައި ޖަމީލަކީ މިއަދު ރާއްޖޭގެ ސިޔާސީ މައިދާނުގައި ބަނޑުއަކިރި އެވެ. އިތުރު މީހަކު ސިފަކުރި ގޮތުގައި ޖަމީލަކީ މިހާރު ގައުމުގެ ފީކުދާންޏެކެވެ.