މެލޭޝިއާގެ ކުރީގެ ބޮޑުވަޒީރު އަވަހާރަވުމުން ރައީސް ތައުޒިޔާ ވިދާޅުވެއްޖެ

މެލޭޝިއާގެ ކުރީގެ ބޮޑުވަޒީރު އަބްދުﷲ އަހުމަދު ބަދާވީ: ފޮޓޯ/ މެލޭ މެއިލް

މެލޭޝިއާގެ ކުރީގެ ބޮޑުވަޒީރު އަބްދުﷲ އަހުމަދު ބަދާވީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ތައުޒިޔާގެ މެސެޖެއް ފޮނުއްވައިފި އެވެ.

މެލޭޝިއާގެ މިހާރުގެ ބޮޑުވަޒީރު، އަންވަރު އިބްރާހީމަށް ރައީސް ފޮނުއްވި ތައުޒިޔާގެ މެސެޖުގައި، އަބްދުﷲ އަހުމަދު ބަދާވީ އަކީ އެ މަނިކުފާނުގެ ހަޔާތްޕުޅުގެ ބޮޑު ބައެއް، އާންމު ހިދުމަތާއި މެލޭޝިއާގެ ކުރިއެރުމަށް ހާއްސަ ކުރެއްވި ޝަރަފުވެރި ބޭފުޅެއްގެ ގޮތުގައި ފާހަގަކުރައްވައި، ބަދާވީ އަވަހާރަ ވުމުން ފުން ހިތާމައެއް ލިބިވަޑައިގެންނެވި ކަމުގައި ވިދާޅުވެފައިވެ އެވެ.

ރައީސްގެ މެސެޖު ނިންމަވާލައްވާފައި ވަނީ، ފުން ހިތާމައިގެ މިދަނޑިވަޅުގައި އަބްދުﷲ އަހުމަދު ބަދާވީގެ އާއިލާ އަށާއި މެލޭޝިއާގެ ސަރުކާރާއި، ރައްޔިތުންނަށް ތައުޒިޔާ ވިދާޅުވެ، ހަމްދަރުދީ ފޮނުއްވަމުންނެވެ.

އަބްދުﷲ އަހުމަދު ބަދާވީ އަކީ 2003 ވަނަ އަހަރުން 2009 ވަނަ އަހަރަށް ހިދުމަތް ކުރެއްވި، މެލޭޝިއާގެ 5 ވަނަ ބޮޑުވަޒީރެވެ. އެމަނިކުފާނުގެ ބޮޑުވަޒީރު ކަމުގައި އަމާޒު ހިއްޕެވީ އިސްލާމީ އުސްލޫބު ފަތުރުއްވައި، މެލޭޝިއާގެ އިގުތިސާދަށް ކުރިއެރުން ހޯއްދަވައިދެއްވައި، ގައުމީ އެއްބައިވަން ތަކަން ގާއިމު ކުރެއްވުމަށެވެ.

ރައީސް ޑރ މުޢިއްޒު މެލޭޝިޔާ