ވެލާނާ އިންޓަނޭޝަނަލް އެއާޕޯޓްގެ 59 ވަނަ އަހަރީ ދުވަސް ފާހަގަ ކޮށްފި އެވެ.
އަހަރީ ދުވަހުގެ މުނާސަބަތުގައި އެންމެ ފުރަތަމަ ބާއްވާފައި ވަނީ ދިދަ ނެގުމުގެ ރަސްމިއްޔާތެކެވެ. ވެލާނާ އެއާޕޯޓުގައި އޮތް މި ރަސްމިއްޔާތުގައި ކުންފުނީގެ މެނޭޖްމެންޓާއި މުވައްޒަފުންގެ އިތުރުން ބައެއް ސްޓޭކް ހޯލްޑަރުން ބައިވެރިވި އެވެ.
ދިދަ ނެގުމުގެ ރަސްމިއްޔާތުގައި އެމްއޭސީއެލްގެ ސީއީއޯ އަދި މެނޭޖިން ޑައިރެކްޓަރު އިބްރާހީމް ޝަރީފް ވަނީ އެއާޕޯޓުގެ ތަރައްގީ އަށް ޓަކައި ސަރުކާރުން، ވަކިން ހާއްސަކޮށް ރައީސް ޑރ. މުޙައްމަދު މުއިއްޒު ދެއްވާ އަހަމިއްޔަތު ފާހަގަ ކުރައްވައި އެ ކަމަށް ޝުކުރު އަދާ ކުރައްވާފަ އެވެ.
އެއާޕޯޓުގެ ތަރައްގީ އަށް ޓަކައި ވަރަށް މުހިއްމު ބޮޑެތި މަޝްރޫއުތައް ހިނގަމުންދާ ކަން ފާހަގަ ކުރައްވައި ޝަރީފް ވިދާޅުވީ ކޮންޓްރެކްޓަރުން ނިންމާނީ ފެސިލިޓީސް ކަމަށާއި އެ ތަންތަން އޮޕަރޭޝަނަލައިޒްކޮށް، ގައުމަށް އޭގެ ފައިދާ ހޯދައިދޭން ތިބީ މުވައްޒަފުން ކަމަށެވެ.
އެ ގޮތުން އެއާޕޯޓުގެ މުވައްޒަފުންނަކީ އަބަދު ވެސް ގައުމަށް ޓަކައި އަގު ހުރި ހިދުމަތް ތަކެއް ކުރާ ބައެއްކަން ފާހަގަ ކުރައްވައި އެ ކަމަށް ޓަކައި މުވައްޒަފުންނަށް ވެސް ޝުކުރު އަދާ ކުރެއްވި އެވެ.
އެއާޕޯޓުގެ ހަޔާތުގައި ކުރިޔަށް އޮތް އަހަރަކީ ހިދުމަތްތައް ވަރަށް ބޮޑަށް ތަރައްގީ ވެގެން ދާނެ އަހަރެއް ކަން ފާހަގަ ކުރައްވައި ޝަރީފް ވިދާޅުވީ ސްޓޭކް ހޯލްޑަރުންނާއި، ފަސިންޖަރުން އުފާވާ ފަދަ ހިދުމަތް ތަކެއް އެއާޕޯޓުން ދޭން މަސައްކަތް ކުރަން ޖެހޭ ކަމަށެވެ.
ދިދަ ނެގުމުގެ ރަސްމިއްޔާތަށް ފަހު، ދުވަހުގެ މުނާސަބަތުގައި 59 ފޫޓުގެ ކޭކެއް ވަނީ ފަޅާފަ އެވެ. އަދި އެކުވެރިކަމުގެ ހިނގާލުމެއް ވެސް ވަނީ ބާއްވާފަ އެވެ.
އެމްއޭސީއެލުން ބުނީ އަހަރީ ދުވަސް ފާހަގަ ކުރުމަށް ޓަކައި ކުރިޔަށް އޮތް ދުވަސް ތަކުގައި މުވައްޒަފުންނަށް ހާއްސަ ގާލާ ނައިޓަކާއި، ވަން ޑޭ ހޭންޑްބޯލް މުބާރާތެއް ވެސް ކުރިޔަށް ގެންދަން ނިންމާފައިވާ ކަމަށެވެ.
ކޮމެންޓް