މޫމިންގެ ވާހަކަ އަބަދުގެ އަބަދަށް ދައްކާނެ: ނޫރު

މީގެކުރިން ކާމިޔާބު ފިލްމުތަކެއް ޑައިރެކްޓް ކޮށްފައިވާ މޫމިން ފުއާދުގެ އައު ދިވެހި ފިލްމު "އަބަދަށް" އޮލިމްޕަހުގެ ބޮޑު ސުކްރީން އަންނާން ތައްޔާރު ވެއްޖެ އެވެ. މި އަހަރު އޮލިމްޕަހުގައި އެންމެ ފުރަތަމަ އަޅުވަން ހަމަޖެހިފައިވާ މި ފިލްމު، ޕްރިމިއާ ކުރުމަށް ހަމަޖެހިފައި ވަނީ މި އޭޕްރީލް 28 ވަނަ ދުވަހު އެވެ.

ކުޅަދާނަ ޑައިރެކްޓަރު މޫމިން ފުއާދު ލިޔެ، ޑައިރެކްޓު ކުރާ ފިލްމު، "އަބަދަށް"ގެ ފުރަތަމަ ތިން ޝޯގެ ޓިކެޓަށް މިއަދު މެންދުރުފަހު، 12:00 ހަމައަށް ބުކިން ހެދުމުގެ ފުރުސަތު އޮންނާނެ ކަމަށް ފިލްމުގެ ޕްރޮޑިއުސަރު ހުސެއިން ނުރައްދީން (ނޫރު) ނާސިރު ބުންޏެވެ.

ނޫރު ބުނީ މި ފިލްމްގެ ފުރަތަމަ ޝޯއިން ޖާގަ ލިބޭނީ ފުރަތަމަ ބުކުކުރާ މީހުންނަށް ކަމަށާއި ޓިކެޓް ދޫކުރަން ފަށާނީ މިއަދު މެދުރު ފަހު 2:00 ގައި ކަމަށެވެ.

ނޫރު ބުނީ މި ފިލްމުގެ ޕްރިމިއާ ނައިޓުގެ ޓިކެޓް ވިއްކާނީ 200ރ. އަށް ކަމަށާއި އޭގެ ފަހުން ކޮންމެ ޝޯއަކުން ޓިކެޓް ވިއްކާނީ 150ރ. ގެ މަގުން ކަމަށެވެ.

މިއަދުން ފަށައިގެން ފިލްމުގެ އެހެން ތާރީހު ތަކަށް ވެސް ޓިކެޓް ވިއްކަން ފަށާނެ އެވެ. މި ފިލްމަށް ބުކިން ހަދަން ގުޅާނެ ހޮޓްލައިން ނަމްބަރަކީ 7447555 އެވެ. އޭގެ އިތުރުން ވައިބާ އަދި އެސްއެމްއެސް ކޮށްލައިގެން ވެސް ޓިކެޓަށް ބުކިން ހެދޭނެ އެވެ.

މި ފިލްމުގެ ކާސްޓުންގެ ގޮތުގައި ހިމެނެނީ ޔޫސުފް ޝަފީއު (ޔޫއްޕެ) އާއި އިސްމާއީ ރަޝީދު (ކޮޕީ އިއްސެ) އާއި ވާޝިޔާ މުޙައްމަދު އާއި ޝާރިފް އަހުމަދުގެ އިތުރުން ސޫޒަން އިބްރާހީމްފުޅެވެ.

މޫމިން ޑައިރެކްޓް ކޮށްފައިވާ ކާމިޔާބު ފިލްމު ތަކުގެ ތެރޭގައި ހޭލާ، އާއި ލޫދިފާ، ހޭޕީ ބާތުޑޭ އަދި ނިވައިރޯޅި ފާހަގަކޮށްލެވެ އެވެ.