ބޯކޮށް ވާރޭވެހި ލ. ފޮނަދޫގައި ފެންބޮޑުވެގެން އެމްއެންޑީއެފުން ފެން ހިއްކުމުގެ މަސައްކަތް ފަށައިފި އެވެ.
އެމްއެންޑީއެފުން ބުނީ ބޯކޮށް ވާރޭވެހި، މެދު ރާއްޖެ ތެރޭގެ ބައެއް ރަށް ތަކުގައި ފެންބޮޑުވަމުން ދާތީ، އެމްއެންޑީއެފް ސެންޓްރަލް އޭރިއާ ކޮމާންޑުގެ ސިފައިން ހަރަކާތްތެރި ވަމުން އަންނަ ކަމަށެވެ.
އެ ގޮތުން އެ ކޮމާންޑުގެ ސިފައިން މި ވަގުތު އަންނަނީ ފޮނަދޫގައި ފެންބޮޑުވެގެން ފެން ހިންދުމުގައި އެހީތެރިކަން ފޯރުކޮށްދެމުންނެވެ.
މީގެ އިތުރުން ލ. ގަމަށް ވެސް އެހީތެރިވުމުގެ ގޮތުން އެ ރަށު ކައުންސިލަށް ގޯނި ހަވާލުކޮށްފައިވާ ކަމަށް ވެސް އެމްއެންޑީއެފުން ބުނެ އެވެ.
މޫސުމާ ބެހޭ ގައުމީ އިދާރާ (މެޓް އޮފީހުން) ބުނީ މާދަމާ ހެނދުނު 6:00 އާ ހަމައަށް ރާއްޖޭގެ އެކި ހިސާބަށް ވިއްސާ ކުރާނެ އަދި ގުގުރުން އެކަށީގެންވާ ކަމަށެވެ. އޭގެ އިތުރުން މެދުރާއްޖެތެރެ، އާއި ދެކުނުގެ ބައެއް ރަށްރަށަށް ބޯކޮށް ވާރޭ ވެހޭނެ ކަމަށް މެޓުން ލަފާ ކުރެ އެވެ.
ހުޅަނގު ދެކުނާއި ހުޅަނގުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ވައި ޖެހޭއިރު، ވިލާގަނޑުގައި ގަޑިއަކު ގާތްގަނޑަކަށް 35 މޭލު ބާރު މިނުގައި ވައި ގަދަވާނެ ކަމަށް ވެސް މެޓުން ލަފާކޮށްފައިވެ އެވެ.
ކޮމެންޓް