ތ. ހިރިލަންދޫން ފުރައިގެން މާލެއަށް ދަތުރު ކުރަނިކޮށް، އަލިފާން ރޯވި ހޮޅުދޫ ބޯޓުން ގެއްލުނު، މީހާ ހޯދަން އަސްކަރީ ޑްރޯން ބޭނުން ކުރަން ފަށައިފި އެވެ.
ގެއްލިގެން ހޯދަމުން އަންނަނީ ލ. މާވަށަށް ނިސްބަތްވާ، އަލީ މުޝްފިގު މުޙައްމަދު ޝަރީފް، 25، އެވެ.
ޖުމުލު 18 މީހުންނާ އެކު ދަތުރު ކުރަމުން ދިޔަ މުދާ އުފުލާ މި ބޯޓުގައި އަލިފާން ރޯވި ކަމުގެ މައުލޫމާތު އެމްއެންޑީއެފް ސެންޓްރަލް އޭރިއާ ކޮމާންޑަށް ލިބުނީ ރޭ 9:07ހާއިރު، އެވެ. އެއާއެކު، އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑު ވަނީ ބޯޓު އޮތް ސަރަހައްދަށް ގޮސްފަ އެވެ.
އެމްއެންޑީއެފުން ބުނީ، ކޯސްޓްގާޑް ޝިޕް ގާޒީ، އެފްއައިސީ މާފަތް، އެޗްޕީ 114، ޑައިވަރުންނާއި އެއާ ކޯގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑުގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން މުޝްފިގު، ހޯދުމުގެ މަސައްކަތް ކުރަމުން ކަމަށެވެ.
ބޯޓުން ދަތުރު ކުރި 18 މީހުންގެ ތެރެއިން 17 މީހުން ވަނީ ސަލާމަތްކޮށްފަ އެވެ.
މި ހާދިސާގައި ރޯވި ބޯޓު ވަނީ ރޭ ދަންވަރު 02:07 ހާއިރު އަޑިއަށް ގޮސްފަ އެވެ.
ބޯޓުގެ ބައިތައް އޮޔާދާތީ، އެ ސަރަހައްދުން ދަތުރުކުރާ ފަރާތް ތަކުން މި ކަމަށް ސަމާލުކަން ދިނުމަށާއި ރޭގަނޑު މި ސަރަހައްދުން ދަތުރުކުރާ ފަރާތް ތަކުން ހާއްސަ ސަމާލުކަމެއް ދިނުމަށް އެމްއެންޑީއެފުން އިލްތިމާސް ކުރެ އެވެ.
ކޮމެންޓް