ކީރިތި ގުރުއާނުގައި މަނާ ކުރައްވާފައިވާ ފަދައިން މީހުންގެ އަބުރަށް އަރައިގަތުމުންނާއި، ދެބައޮޑުވުމާއި، ދޮގުވާހަކަ ފެތުރުމުން ދުރުހެލިވުމަށް، ރައްޔިތުންގެ ކިބައިން ރައީސް ޑރ. މުޙައްމަދު މުއިއްޒު އެދިވަޑައިގެންފި އެވެ.
މިރޭ އިސްލާމީ މަރުކަޒުގެ ޖަލްސާ ކުރާ މާލަމުގައި ކުރިއަށް ގެންދިޔަ ހާފިޒުން ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުން ކޮންމެ މީހެއްގެ ވެސް "ގައިޑުބުކް" ނުވަތަ އަމަލީ ގޮތުން ކަންކަން ކުރަންވީ ގޮތް ބަލައި، ކަންކަން ކުރަންވީ ގޮތް ދަސް ކުރާ ފޮތަކަށް ކީރިތި ގުރުއާން ހެދުމަށް ރައީސް އެދިވަޑައިގެންނެވި އެވެ. އަދި ކީރިތި ގުރުއާނަކީ ހަމަ އެކަނި ޖަލްސާ ތަކުގައި ކިޔަވާލަން އޮންނަ ފޮތަކަށް ނުހަދައި، އަމަލީ ފޮތެއް ކަމުގައި ހެދުމަށް އެ މަނިކުފާނު ގޮވައިލެއްވި އެވެ.
ހަމަ އެއާއެކު މި މުޖުތަމައުގައި ގެއްލެމުންދާ އިންސާނީ ކަރާމާތް، އަނބުރާ ގެނެވޭނީ ވެސް ކީރިތި ގުރްއާނަކީ ކޮންމެ ދުވަހެއްގެ ވެސް އަމަލުތައް ބައްޓަން ކުރާ ފޮތް ކަމުގައި ހަދައިގެން ކަމަށް އެ މަނިކުފާނު ވިދާޅުވި އެވެ.
މިރޭގެ ވާހަފުޅުގައި ރައީސް ވަނީ މުޅި މުޖުތަމައުގެ ކުރިއެރުމަށް ޓަކައި އެއް މުސްލިމަކު އަނެއް މުސްލިމަކަށް އިހުތިރާމް ކުރުމަށް ބާރު އަޅުއްވައިފަ އެވެ.
ފުރިހަމަ މުސްލިމަކީ އޭނާގެ އަތާއި ދުލުގެ ނުބައިކަމުން އެހެން މުސްލިމުން ސަލާމަތް ވެގެންވާ މީހާ ކަމަށާއި އެ ސުވާލު އަމިއްލަ ނަފުސާމެދު ހެޔޮނިޔަތުގައި ކޮށްފިނަމަ މުޅި މުޖުތަމައު ރަނގަޅު ވާނެ ކަމުގައި ވެސް އެ މަނިކުފާނު ވިދާޅުވި އެވެ. އަދި މި މުޖުތަމައު ރަނގަޅު ވާނީ އަނެކާއަކީ ވެސް ތިމާ ފަދައިން ކަރާމާތެއް އޮތް މީހެއްކަމުގައި ގަބޫލު ކުރުމުން ކަމުގައި ވިދާޅުވެ، އެ މަނިކުފާނު ވަނީ އެ ކަމަށް ބާރު އަޅުއްވާފަ އެވެ.
ރައީސްގެ ވާހަކަފުޅު ނިންމަވައިލައްވާފައި ވަނީ، ކިތަންމެ ގިނަ ބިނާރު ތަކެއްގެ މަސައްކަތް ކުރި ނަމަވެސް، ހަގީގީ ތަރައްގީ ހާސިލު ވާނީ ކީރިތި ގުރުއާނާ އެއްގޮތަށް އަމަލުތައް ބައްޓަން ކުރެވިގެން ކަން ފާހަގަ ކުރައްވަމުންނެވެ.
ކޮމެންޓް