އިންސާނާގެ އަމަލު ތަކުގެ ވާހަކަ ފަތްފުށްތަކުގައި މަލާއިކަތުން ލިޔުއްވާނެކަން ދަނެ، ހެޔޮ އަމަލެއް މެނުވީ ނުކުރުމަށް މިއަދުގެ ހުކުރު ހުތުބާގައި ގޮވާލައިފި އެވެ.
އިސްލާމިކް މިނިސްޓްރީން ނެރެފައިވާ މިއަދުގެ ހުކުރު ހުތުބާގެ މައުލޫ އަކީ "ލައިލަތުލްގަދްރި" އެވެ.
މިއަދުގެ ހުތުބާގައި ކިޔަމަންތެރިވެ، މާތް އަށް ތަގުވާވެރި ވުމަށާއި ހެޔޮ އަމަލާ އެކު މި މާތް މައްސަރު ނިންމައިލެވޭތޯ ބެލުމަށާއި އަމިއްލަ ނަފުސަށް ކުރެވޭ އަހުދު ތަކަށް ރައްކާތެރި ވުމަށް ގޮވާލި އެވެ. އަދި އިސްތިއުފާރު ކުރުމުން ރޯދައަށް ހުންނަ އިރު، އެ މީހަކަށް ކުރެވޭ ކުދިކުދި ފާފަތައް ފުއްސަވައި ދެއްވާނޭ ކަމެއް ކަން ވަނީ ފާހަގަކޮށްފަ އެވެ.
ކީރިތި ރަސޫލާ މުހައްމަދު ސައްލަﷲ އަލައިހި ވަސައްލަމް، ގެ ބައެއް ހަދީސްފުޅުތަކުގެ މާނައަށް ވެސް މިއަދުގެ ހުތުބާގައި އަލިއަޅުވާލާފައިވެ އެވެ.
އެގޮތުން ވަނީ ތިބާ ވީ ކޮންމެ ތަނެއްގައި، މާތް ﷲ ބިރުވެތިވެ، އަދި ނުބައިކަމެއް ކުރެވިއްޖެ ނަމަ، އެއާ ވިދިގެން ހެޔޮ ކަމެއް ކުރުމަށް ނަސޭހަތްތެރިވެފަ އެވެ. އަދި އެ ހެޔޮ ކަމަކީ އެ ނުބައި ކަން ފިލުވައިލަނިވި، ކަމެއްކަން ފާހަގަކޮށް ހުތުބާގައި ވަނީ މާތްﷲގެ ހަޒުރަތަށް ކުއްތަންވެ، އެ ކަލާނގެއަށް އޮންނަ އިތުބާރު ހަރުދަނާ ކުރުމަށް ބުނެފަ އެވެ.
އަދި އެ ކަލާނގެ ރަޙްމަތްފުޅުން ދެއްވައިފައިވާ ނިއުމަތް ތަކަށް ޝުކުރުވެރިވެ، އިސްލާމްކަން މަތީ، ހެޔޮ ހާލުގައި ތިބެ ރަމަޟާން މަހާ ބައްދަލުވުމަކީ ކުޑަ ނިއުމަތެއް ނޫންކަން ވެސް ހުތުބާގައި ފާހަގަ ކުރި އެވެ.
"މިހާރު އަހަރެމެން މި ތިބީ މި މަހުގެ ފަހު ދިހައިގެ ތެރޭގަ އެވެ. ވީމާ އަހަރެމެންގެ ހެޔޮ އަމަލުތައް ގަބޫލު ކުރައްވައިތޯ މާތް اللهގެ ޙަޟްރަތުގައި ދުޢާދަންނަވާށެވެ، މިއީ ބަރަކާތުން ފުރިގެންވާ ދުވަސްތަކެކެވެ، މި ދުވަސް ތަކާއި ރޭތައް އިހުޔާ ކުރުމަކީ އެ ކަމުގެ ދަރުމަ އާއި ސަވާބުގެ މިންވަރު ހިސާބު ކުރާން ނޭނގޭ ވަރަށް އިތުރު ކޮށްދެއްވާ ކަމެކެވެ. ރަމަޟާން މަހުގެ ފަހު ދިހައިގައި ކީރިތި ރަސޫލާ މުޙައްމަދު ސައްލަﷲ އަލައިހި ވަސައްލަމް، އަމަލުފުޅު ބެހެއްޓެވި ގޮތަށް ބަލާ އިރު، އެ ކަލޭގެފާނު ރޭ އަޅުކަމުގައި ގިނަ ވަގުތު ހޭދަ ކުރައްވައެވެ،" ހުތުބާގައި ބުންޏެވެ.
ފަހު ދިހައިގައި ލައްވައިފައިވާ ބަރަކާތްތެރިކަން ބޮޑު ރެއަކީ ލައިލަތުލްގަދްރިވިލޭރޭ ކަމަށާއި އެ ރޭ ކުރާ ހެޔޮ ކަމުގެ ދަރުމަ އެ ނޫން ވަގުތުގައި، އެއް ހާސް މައްސަރުގައި ކުރާ ހެޔޮ ކަމަށް ވުރެ މަތިވެރިކުރައްވައިވާ ކަމަށް ހުތުބާގައި ބުންޏެވެ.
އޭގެ އިތުރުން މި މަތިވެރި ރެއަކީ މާތްﷲ، އެ ރެއެއްގައި މީހަކަށް މުޅި އުމުރުގައި ދެއްވާނެ އެންމެ މަތިވެރިކަން ހާސިލު ކުރެވިދާނެ ރޭ ކަން ވެސް ވަނީ ފާހަގަ ކޮށްފަ އެވެ.
"ލައިލަތުލްގަދުރިވިލޭރޭ، އެއް ހާސް މައްސަރަށް ވުރެ ހެޔޮ ކަން ބޮޑެވެ." މި ބަސްފުޅުން އެނގޭ ގޮތުގައި އެ ރޭ، ކުރާ ހެޔޮ ކަމުގެ ދަރުމަ ދެއްވަނީ އެއް ހާސް މައްސަރުގައި ކުރާ ހެޔޮ ކަމާ އެއްވަރުގެ ހެޔޮ ކަމެއްނޫނެވެ. އަދި ކިއެއްތަ، އެއް ހާސް މައްސަރުގައި ކުރެވޭ ހެޔޮ ކަމަށްވުރެ ވެސް އިތުރުކޮށެވެ. އެހެންވީމާ، މި ފުރުސަތުގެ ބޭނުން ހެޔޮ ގޮތުގައި ހިފާށެވެ،" ކީރިތި ގުރުއާނުގެ އާޔަތަކުން މިސާލު ނަގައި ހުތުބާގައި ބުންޏެވެ.
ފަހު ދިހައިގައި އިއުތިކާފަށް އިނުމުގެ މުހިއްމު ކަމަށް އަލިއަޅުވާލާ މިއަދުގެ ހުތުބާގައި ބުނީ ކީރިތި ރަސޫލާ މުޙައްމަދު ސައްލަﷲ އަލައިހި ވަސައްލަމް، ދުނިޔެ ދޫ ކުރެއްވުމާ ހަމައަށް ރަމަޟާން މަހުގެ ފަހު ދިހައިގައި އިއުތިކާފަށް އިންނެވި ކަމަށެވެ.
އިއުތިކާފަށް އިންނަ މީހާ، ބޭކާރު ކަންތައް ތަކާއި ވާހަކަ ތަކުން ދުރުހެލިވެ، މާތްﷲ އަށް އަޅުކަން ކުރުމާއި ކީރިތި ގުރުއާން ކިޔެވުމާއި ޒިކުރު ކުރުމުގައި ވަގުތު ހޭދަ ކުރާން ވާނެ ކަމަށާއި އަދި މިސްކިތުގައި ހޭދަ ކުރާ ވަގުތު ތަކުގައި މިސްކިތުގެ ސާފު ތާހިރު ކަމަށާއި، މިސްކިތުގެ ހުރުމަތަށް އިސްކަން ދޭން ވާނެ ކަމަށް ހުތުބާގައި ބުނެފައިވެ އެވެ.
މިސްކިތުގެ ހުރުމަތް ގެއްލޭ ފަދަ އެއްވެސް ކަމެއް ކޮށްގެން ނުވާނެކަން ފާހަގަކޮށް ހުތުބާގައި ވަނީ މިސްކިތް ތަކަކީ ބިންމަތީގައިވާ އެންމެ މާތް ތަންތަން ކަމަށާއި އަދި އެއީ މާތްﷲ ގެ ގެ ކޮޅުތައް ކަމަށް ބުނެފަ އެވެ. އެހެންވެ، އެ ކަން އަބަދު ވެސް ހަނދާން ކުރާން ވެސް ވަނީ ގޮވާލައިފަ އެވެ.
ފިތުރު ޒަކާތަށް އަލިއަޅުވާލައި ހުތުބާގައި ބުނީ ޒަކާތަކީ މި ބަރަކާތްތެރި މައްސަރާ ވިދިގެން އަދާ ކުރާން އަމުރު ކުރައްވައިފައިވާ އަޅު ކަމެއް ކަމަށެވެ. ފިތުރު ޒަކާތަކީ ރޯދަމަހު، ރޯދަތައް ހިފި އިރު ކުރެވިފައިވާ އުނި ކަންކަން ފޫބައްދައިދޭ ކަމެކެވެ.
"ރޯދައަށް ހުރެ ދެއްކޭ ބާތިލު ވާހަކަ ތަކާއި ކުރެވޭ ނުރަނގަޅު ކަންކަމުން، ރޯދަވެރީންނަށް ތާހިރު ކަމެއްގެ ގޮތުގައްޔާއި، މިސްކީނުންނަށް ދެވޭ ކެއުމެއްގެ ގޮތުގައި ކީރިތި ރަސޫލާ މުޙައްމަދު ސައްލަﷲ އަލައިހި ވަސައްލަމް ފިތުރުޒަކާތް ފަރުޟު ކުރެއްވެވި، އެހެންކަމުން ތިމާއާއި ތިމާގެ ބެލުމުގެ ދަށުގައިވާ މީހުންނާއި ކުދީންގެ ފަރާތުން ފިތުރު ޒަކާތް ނެރުމަށް އަވަސް ވާށެވެ،" ހުތުބާގައި ހަނދާން ކޮށްދީފައިވެ އެވެ.
ކޮމެންޓް