ޕްރައިވެޓް އިންޝުއަރެންސް އޮންނަ ނަމަ އެ ލިމިޓު ހަމަވުމުން ނޫނީ އާސަންދަ ނުދޭން ނިންމި ނިންމުން ބަދަލުކޮށް، ޕްރައިވެޓް އިންޝުއަރެންސާއެކު އަލުން އާސަންދަ ލިބޭ ގޮތަށް ބަދަލު ކޮށްފި އެވެ.
ސިއްހީ ހިދުމަތްދޭ ތަންތަނުން ހިދުމަތް ލިބިގަންނަ ބަލިމީހުންގެ ޕްރައިވެޓް އިންޝުއަރެންސް އޮންނަ ނަމަ އެ އިންޝުއަރެންސަށް ކެނޑުމަށް ފަހު އާސަންދަ ދޭ ގޮތަށް ބަދަލު ކުރީ މިދިޔަ އަހަރުގެ ނޮވެމްބަރު މަސް ތެރޭގަ އެވެ. އެގޮތަށް އޭރު ނިންމީ އާސަންދަ އިސްލާހުކޮށް، ދައުލަތުން ބޭސްފަރުވާއަށް ކުރާ ހަރަދު ކުޑަކުރުމަށެވެ.
އާސަންދަ އިން މިއަދު ނެރުނު ބަޔާނުގައި ބުނީ އައުޓް ޕޭޝަންޓް ހިދުމަތަށް ޕްރައިވެޓް އިންޝުއަރެންސާއެކު އާސަންދަ ސުކީމުން އެ ހިދުމަތަށް ކަނޑައަޅާފައިވާ އަދަދު ވެސް އެކުއެކީ ލިބޭނެ އިންތިޒާމް ހަމަޖެއްސުމަށް ޓަކައި ސިއްހީ ހިދުމަތްދޭ އަމިއްލަ މަރުކަޒު ތަކުގެ ސިސްޓަނަށް ގެންނާންޖެހޭ ބަދަލުތައް ގެނެސްފައިވާ ކަމަށެވެ.
"މި ބަދަލާއެކު 10 މާޗު އިން ފެށިގެން ޑޮކްޓަރަށް ދެއްކުމަށް ނަގާ ކޮންސަލްޓޭޝަން ފީ އު ސޫލުން ތަންފީޒު ކުރެވިގެންދާނެ، އައުޓް ޕޭޝަންޓު އެހެނިހެން ހިދުމަތް ތަކަށް މި އުސޫލުން އަމަލު ކުރަން ފަށާނީ 27 މާޗު 2025 އިން ފެށިގެން،" އާސަންދައިން ބުންޏެވެ.
އާސަންދަ އިން ބުނީ މި އާއެކު ޕްރައިވެޓް އިންޝުއަރެންސް އޮންނަ ފަރާތްތަކުން ހިދުމަތް ހޯދާއިރު، އެންމެ ފުރަތަމަ ޗާޖު ކުރާނީ ޕްރައިވެޓް އިންޝުއަރެންސް ޕްލޭން އިން ފޯރުކޮށްދޭ މިންވަރުން ކަމަށެވެ. އެއާއެކު، ޕްރައިވެޓް އިންޝުއަރެންސް ޕްލޭން އިން ކަވަރު ކުރާ މިންވަރަށްވުރެ އިތުރުވާ އަދަދު އާސަންދަ އިން ވެސް ފޯރުކޮށްދޭނެ އެވެ.
ކޮމެންޓް