މުރަކަ ދިރުވާ އާލާ ކުރާން "ރީފްސީޑް"ގެ ނަމުގައި ޕްރޮޖެކްޓެއް ފަށައިފި އެވެ.
މޯލްޑިވްސް މެރިން ރިސާޗް އިންސްޓިޓިއުޓުން ފެށި މި ޕްރޮޖެކްޓް ކުރިއަށް ގެންދަނީ އޮސްޓްރޭލިއަން އިންސްޓިޓިއުޓް ފޯ މެރިން ސައިންސް އާއި ކޮމަންވެލްތް ސައިންޓިފިކް އެންޑް އިންޑަސްޓްރިއަލް ރިސާޗް އޯގަނައިޒޭޝަން އާއި ގުޅިގެންނެވެ.
މުޅިއެކު ތިން އަހަރު ދުވަހުގެ މުއްދަތަށް ކުރިއަށް ގެންދާ މި ޕްރޮޖެކްޓަށް ކަނޑައަޅާފައި ވަނީ 1.5 މިލިއަން ޑޮލަރެވެ.
މި ޕްރޮޖެކްޓްގެ އަމަލީ މަސައްކަތްތައް ރާއްޖޭގައި ފެށުން ފާހަގަ ކުރުމަށް ޓަކައި "ރީފް ސީޑް ޑެމޮންސްޓްރޭޝަން ޑޭ" ގެ ނަމުގައި ހާއްސަ ހަރަކާތެއް އިއްޔެ ވަނީ ކ. މަނިޔަފުށީގައި ބާއްވާފަ އެވެ.
ފިޝަރީޒް މިނިސްޓްރީން ބުނީ ރީފްސީޑް ޕްރޮޖެކްޓްގެ ދަށުން "ރީފްސީޑް ސިސްޓަމް"ގެ ނަމުގައި، މުރަކައިގެ ބިސް އަދި ލާވޭ ބޭނުން ކޮށްގެން މުރަކަ އާލާ ކުރުމުގެ ހާއްސަ އެކުއަކަލްޗާ ކޮންޓެއިނަރު ސިސްޓަމެއް އޮސްޓްރޭލިޔާގައި ތައްޔާރުކޮށް، އެ ސިސްޓަމް މިހާރު ކ. މަނިޔަފުށީގައި ހިންގާ މެރިކަލްޗާ ރިސާޗް އެންޑް ޓްރެއިނިން ފެސިލިޓީގައި ބަހައްޓާފައިވާ ކަމަށެވެ.
އަދި މި ސިސްޓަމްގައި މުރަކައިގެ ބިސް، އެކުއަކަލްޗާ ފަންނުތައް ބޭނުން ކޮށްގެން، ލާވޭގެ ސްޓޭޖުން ފަރު ތަކުގައި އަށަގަންނަ މިންވަރަށް ބޮޑުކޮށް، އަދި ކަނޑައެޅޭ ފަރުތަކަށް ބަދަލުކޮށް، މި ޓެކްނޮލޮޖީގެ ޒަރިއްޔާއިން ފުޅާ ދާއިރާ އެއްގައި ފަރުތައް އިޔާދަ ކުރުމުގެ ފުރުސަތު އޮތް މިންވަރު ދެނެ ގަތުމުގެ ދިރާސާ މަސައްކަތްތައް ކުރުމަށް ނިންމާފައިވާ ކަމަށް ވެސް މިނިސްޓްރީން ބުންޏެވެ.
ކޮމެންޓް