އިސްލާމިކް މިނިސްޓްރީގެ ހިންގުން ހަރުދަނާ ކުރަން އޮނިގަނޑަށް ބަދަލުތަކެއް!

އިސްލާމިކް މިނިސްޓްރީއަށް ޒަމާނީ ބަދަލު ތަކެއް ގެނެސް އިދާރީ ހިންގުން ރަނގަޅު ކުރުމަށް އޮނިގަނޑަށް ބަދަލު ތަކެއް ގެނެސްފި އެވެ.

މިނިސްޓަރު ޑރ. ޝަހީމްގެ އިސް ނެންގެވުމުގެ މަތީން މިނިސްޓްރީގެ އޮނިގަނޑައަށް ގެނައި ބަދަލާއެކު ބައެއް ސެކްޝަން ތަކަށް ބޮޑެތި ބަދަލު ތަކެއް ވަނީ އައިސްފަ އެވެ.

އެގޮތުން ކޯޕަރޭޓް އެފެއާޒް ޑިޕާޓްމަންޓުގެ ހިއުމަން ރިސޯސް ސެކްޝަންގެ ދަށުން ޓްރެއިނިން އަދި ޕާފޯމަންސް މެނޭޖްމަންޓަށް ހާއްސަ ޔުނިޓެއް އުފައްދާފައި ވާއިރު މިނިސްޓާސް ސެކްރެޓޭރިއެޓް ސެކްޝަން އުފައްދާ އެ ސެކްޝަންގެ ދަށުން ސެކްރެޓޭރިއެޓް ޔުނިޓް، ފޮރިން ރިލޭޝަންސް ޔުނިޓް، މީޑިއާ ޔުނިޓް އަދި ޕޮލިސީ އެންޑް ސްޓެރެޖިކް ޕްލޭނިން ޔުނިޓު އުފެއްދުމާއި ވަޒީރާއި ޕާމަނެންޓް ސެކްރެޓަރީގެ ސީދާ ބެއްލެވުމުގެ ދަށުން މި ސެކްޝަން ހިންގާ ގޮތަށް ވަނީ ހަމަޖައްސާފަ އެވެ.

މީގެ އިތުރުން އިސްލާމިކް އެފެއާޒް ޑިޕާޓްމަންޓުގެ މޮސްކް އެފެއާޒް ޑިވިޝަންގެ ނަން އައުގާފް އެންޑް އިސްލާމިކް ޑިވެލޮޕްމެންޓް ޑިވިޝަނަށް ބަދަލުކޮށް މި ޑިވިޝަންގެ ދަށުގައި އޮތް އައުގާފް އެންޑް އިންފްރާސްޓްރަކްޗާ ޑިވެލޮޕްމެންޓް ސެކްޝަން ދެ ސެކްޝަނަކަށް ބަދަލުކޮށް އައުގާފް ސެކްޝަނާއި އިންފްރާސްޓްރަކްޗާ ޑިވެލޮޕްމެންޓް ސެކްޝަން ވަކިން މަސައްކަތް ކުރާ ގޮތަށް ވެސް ވަނީ ބަދަލުކޮށްފަ އެވެ.

އަދި އައުގާފް ސެކްޝަންގެ ދަށުން އައުގާފް އެޑްމިނިސްޓްރޭޝަން ޔުނިޓާއި ފަންޑް މެނޭޖްމަންޓު ޔުނިޓް އުފެއްދުމާއި، މޮސްކް މެނޭޖްމެންޓް ސެކްޝަންގެ ދަށުން ގްރޭޓާ މާލެ މޮސްކްސް ޔުނިޓާއި، ނޮދަން މޮސްކިސް ޔުނިޓް އަދި ސަދަން މޮސްކްސް ޔުނިޓު އުފެއްދުމަށް ވަނީ ހަމަޖެހިފަ އެވެ.

ވުޒާރާގެ އިސްލާމިކް އެފެއާޒް ޑިވިޝަންގެ ދަށުގައި އޮތް އިސްލާމިކް ދައުވާ ސެކްޝަންގެ ނަން ދައުވާ އެންޑް ގައިޑަންސް ސެކްޝަނަށް ބަދަލު ކޮށްފައިވާއިރު، އިސްލާމިކް ސައުވާ ސެކްޝަންގެ ދަށުގައި އޮތް ދެ ޔުނިޓް އުވާލާ ދައުވާ އެންޑް ގައިޑަންސް ސެކްޝަންގެ ދަށުން 3 ޔުނިޓެއް އުފެއްދުމަށް ވަނީ ހަމަޖެހިފައެވެ.

އެއީ ގްރޭޓާ މާލެ ރީޖަން އެވެޔަނަސް ޔުނިޓާއި، ނޮދަން ރީޖަން އެވެއަނަސް ޔުނިޓާއި، ސަދަން ރީޖަން އެވެއަނަސް ޔުނިޓެވެ.

މީގެ އިތުރުން މީޑިއާ އެންޑް ޕަބްލިކޭޝަން ސެކްޝަންގެ ނަން ރިސާޗް އެންޑް ޕަބްލިކޭޝަން ސެކްޝަނަށް ބަދަލުކޮށް، ރިސާޗް އެންޑް ޕަބްލިކޭޝަން ސެކްޝަންގެ ދަށުން ރިސާޗް އެންޑް ޑިވެލޮޕްމެންޓް ޔުނިޓު އުފެއްދުމާއި، ކުރިން އޮތް މީޑިއާ އެންޑް ޕަބްލިކޭޝަން ސެކްޝަންގެ ދަށުގައި އޮތް އިސްލާމިކް ލައިބްރަރީ ޔުނިޓު މި ޑިވިޝަންގެ ދަށުގައި އޮންނަ ވަކި ސެކްޝަނަކަށް ހެދުމަށާއި ހައްޖު އެންޑް އުމްރާ ޔުނިޓް ސެކްޝަނަކަށް ހެދުމަށް އާ އޮނިގަނޑުގައި ވަނީ ކަނޑައަޅާފަ އެވެ.