މާލޭ ސިޓީ ކައުންސިލަށް އެސްޖީއަކު ހޯދަނީ

މާލޭ ސިޓީ ކައުންސިލް --

މާލެ ސިޓީ ކައުންސިލްގެ އިދާރާގެ ސެކްރެޓަރީ ޖެނެރަލް (އެސްޖީ)ގެ މަގާމަށް މީހަކުން ހޯދަން ސިވިލް ސާވިސް ކޮމިޝަން (ސީއެސްސީ) އިން އިއުލާނު ކޮށްފި އެވެ.

މި މަގާމަށް އެދި ހުށަހަޅާން ޖެހޭ ލިޔެކިޔުންތައް ހުށަހަޅާނީ 6 އޭޕްރީލް ވާ އާދިއްތަ ދުވަހުގެ 13:00 ގެ ކުރީން ސިވިލް ސާވިސް ކޮމިޝަނުގެ އިދާރާ އަށެވެ.

ފަސް އަހަރުގެ މުއްދަތަކަށް އައްޔަން ކުރާ މި މަގާމުގެ މުސާރައިގެ ގޮތުގައި މަހަކު 20,500ރ. ލިބޭއިރު އެގްޒެކެޓިވް އެލަވަންސްގެ ގޮތުގައި މަހަކު 15,000ރ. ލިބޭނެއެވެ.

އޭގެ އިތުރުން އެހެނިހެން އިނާޔަތް ތަކުގެ ގޮތުގައި ސިވިލް ސާވިސްގެ މުވައްޒަފުންނަށް ހަމަޖެހިފައިވާ އުސޫލުން ބޭސް ފަރުވާގެ ހިދުމަތާއި ދިވެހިރާއްޖޭގެ ޕެންޝަނާ ބެހޭ ގާނޫނުގެ ދަށުން ލިބިދެވޭ ޕެންޝަން ކޮންޓްރިބިއުޝަން ހިމެނެ އެވެ.

މަގާމުގެ މައިގަނޑު މަސްއޫލިއްޔަތު ތަކާއި ވާޖިބު ތަކުގެ ތެރޭގައި ވަނީ ދިވެހި ސިވިލް ސާވިސްގެ ގަވާއިދު 2014 ގެ ދަށުން ކައުންސިލް އިދާރާ ތަކުގެ އެންމެ އިސް އިދާރީ މުވައްޒަފުގެ ހައިސިއްޔަތުން އަދާ ކުރާން ޖެހޭ ޒިންމާތައް އަދާ ކުރުމެވެ. އަދި މާލީ ޒިންމާދާރު ވެރިޔާގެ މަސްއޫލިއްޔަތު ވެސް އަދާ ކުރާން ޖެހޭނީ ކައުންސިލްގެ ސެކްރެޓަރީ ޖެނެރަލެވެ.

މާލެ ސިޓީ ކައުންސިލް