ލަންދޫ ފުޓުބޯޅަ ދަނޑުގެ މަޝްރޫޢަކީ ރައީސް އިބްރާހިމް މުހައްމަދު ސޯލިހުގެ ވެރިކަމުގައި “ނަމެއްގައި” ފެށި މަޝްރޫއެކެވެ. 2021 ވަނަ އަހަރު ހަވާލުކުރި މި މަޝްރޫޢުގެ އެންމެ ކުޑަމިނުން ސަބްބޭސްވެސް ވާރުވަތީ ރައީސް ޑރ މުޙައްމަދު މުޢިއްޒުގެ މި ސަރުކާރަށެވެ.
ނިމިދިޔަ ރިޔާސީ އިންތިހާބުގައިވެސް، މަޖިލިސް އިންތިހާބުގައިވެސް އަދި ލަންދޫ ކައުންސިލުން ދެ ގޮނޑިއެއް ހުސްވެގެން ބޭއްވި ދެ ބައި އިލެކްޝަންގައިވެސް ޒުވާނުން ދެއްކީ އެއް ވާހަކައެކެވެ. ލަންދޫ ފުޓުބޯޅަ ދަނޑުގެ މަސައްކަތް ނުނިމި ދިގުލައިގެން ދިއުމާއި ކުޅިވަރުގައި މިއިން ދުވަހަކު ފަތަހަށް ނުދާ ވަރަށް ފަހަތަށް ސޮއްސާލި ވާހަކައެވެ.
މި ސަރުކާރުގެ ސްޕޯޓްސް މިނިސްޓަރ ރާފިޢު ލަންދުއަށް ވަޑައިގެން ދެއްވި ޔަޤީންކަމަކީ ދަނޑުގެ މަސައްކަތް ލަސްނުވެ ނިންމަވާނެކަމުގެ ޔަޤީންކަމެވެ. ކުޅިވަރުގެ ވަޞީލަތްތައް ތަރައްޤީ ކޮށްދެއްވާނެ ކަމުގެ ކަށަވަރުކަން ތަކުރާރުކޮށް ޒުވާނުންނަށް ދެއްވިއެވެ.
ލަންދޫ ފުޓުބޯޅަ ދަނޑަށް ބޭނުންވާ ސާމާނު ހަމަކޮށް ދަނޑު ނިންމުމުގެ މަސައްކަތް ބާރު ސްޕީޑުގައި މިހާރު ވަނީ ފެށިފައެވެ. ހުރިހާ ޓާފެއް ރަށަށް ގެނެވި އެންމެ ފަހު މަރުހަލާގެ މަސައްކަތްތައް މިހާރު ދަނީ ކުރަމުންނެވެ.
“ލަންދޫ ދަނޑުގައި ޓާފް އަޅައި ޕިޗްގެ މަސައްކަތް ކުރިއަށް އޮތް 30 ދުވަސް ތެރޭގައި ނިންމާލެވޭނެ ކަމަށް އުއްމީދު ކުރެވެނީ. ދަނޑުގެ ސަބްބޭސްވެސް މިހާރު އެ ވަނީ ރަނގަޅު ކުރެވިފައި. ޒުވާނުންގެ އުއްމީދުތައް ހަޤީޤަތަކަށް ވެގެން މިދަނީ. އިރާދަކުރެއްވިއްޔާ ވަރަށް އަވަހަށް ދަނޑު ހުޅުވި ދަނޑުގައި ކުޅެން ފެށޭނެ” ލަންދޫ ކައުންސިލްގެ ނައިބު ރައީސް މަންސޫރު މުޙައްމަދު ވިދާޅުވިއެވެ.
ލަންދޫއަކީ ފުޓުބޯޅައިގައި ގަދަ ބާރެކެވެ. ފޯރިގަދަ އެތައް މުބާރާތެއް ބޭއްވި ރަށެކެވެ. ލަންދޫގެ ބޮޑު ދަނޑާއެކު އެ ފޯރި އަންނާނެ ކަމާމެދު ޝައްކެއްނެތެވެ.
ކޮމެންޓް