ކުދި ގައުމުތަކުގެ މަސްލަހަތު ހިމާޔަތް ކުރާން ކޮމަންވެލްތުން ކުރާ މަސައްކަތުގެ އަގު ވަޒަންކުރަން: ރައީސް

ކުދި ދައުލަތްތަކުގެ މަސްލަހަތު ހުރި ކަންކަމުގައި ކޮމަންވެލްތުން ކުރާ މަސައްކަތުގެ އަގުވަޒަން ކުރައްވާ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ރައީސް މިކަން ހާމަ ކުރެއްވީ ކޮމަންވެލްތު ދުވަހުގެ މުނާސަބަތުގައި އިނގިރޭސި ބަހުން ފޮނުއްވި މެސެޖެއްގަ އެވެ.

އެ މަނިކުފާނުގެ މެސެޖުގައި ކޮމަންވެލްތު ދުވަސް ފާހަގަކުރަމުންދާ މި ދަނޑިވަޅުގައި ހަނދާންކޮށްދެނީ، ކޮމަންވެލްތު އާއިލާގެ އެއްބައިވަންތަ ކަމުގައި ހުރި ބާރުކަމަށް ވިދާޅުވި އެވެ. ކޮމަންވެލްތަށް، އެއްބައިވަންތަ ކަމަކީ ހަމައެކަނި މަފުހޫމެއް ނޫން ކަމަށާއި، އެއީ ދޭދޭ މެންބަރުން ހިއްސާކުރާ ގޮންޖެހުންތަކުން އަރައިގަތުމަށް ބޭނުންވާ އެއްބާރުލުން ހޯދައިދޭ ހަކަތަކަމުގައި އެމަނިކުފާނު ވިދާޅުވެފައިވެ އެވެ.

އެމަނިކުފާނުގެ މެސެޖުގައި އިތުރަށް ވިދާޅުވީ، މި އަހަރުގެ ކޮމަންވެލްތު ދުވަހުގެ ޝިއާރު "ޓުގެދާ ވީ ތްރައިވް" އަކީ ދިވެހި ދައުލަތުން އެއްބައިވަންތަ ކަމާއި، ވިލުންތެރި ކަމާއި ކުރިއެރުމަށް ދޭ އަހަންމިއްޔަތު ރަމްޒުކޮށްދޭ ޝިއާރެއްކަމަށެވެ.

ހަމަނުޖެހުމާއި، ނާއިންސާފުގެ ހިޔަނި މި ދުނިޔެއަށް އެޅިފައިވާކަން ފާހަގަ ކުރައްވަމުން އެ މަނިކުފާނު ވަނީ، މިފަދަ އުނދަގޫ ވަގުތެއްގައި ސަލާމަތް ކަމާއި ކުރިއެރުން ހޯދުމަށް ޓަކައި، މުޅި ކޮމަންވެލްތުން ބައިވެރިވެގެން ހިންގާ ހަރަކާތުގެ ބުރަދަން ދެނެ ތިބެ، އެއްބައެއްގެ ގޮތުގައި ދެމި ތިބުމަށް ގޮވާލައްވާފަ އެވެ.

"ދިވެހިރާއްޖެ ފަދަ ކުދި ދައުލަތްތަކުގެ ހައްގުގައި އަޑުއުފުލައި، މޫސުމީ ވިލުންތެރި ކަމާއި، މާލީ ވަސީލަތް ތަކަށް ފުރުސަތު ފަހި ކުރުމާއި، އަންހެނުންނާއި ޒުވާނުން ބާރުވެރި ކުރުން ފަދަ، ހާއްސަކޮށް ކުދި ދައުލަތް ތަކުގެ މަސްލަހަތު ހުރި ކަންކަމުގައި ކޮމަންވެލްތުން ކުރައްވާ މަސައްކަތުގެ އަގުވަޒަން ކުރަން،" ރައީސްގެ މެސެޖުގައިވެއެވެ.

ކޮމަންވެލްތު ޗާޓަރުން ލާޒިމުކުރާ ޑިމޮކްރަސީގެ އަސާސްތައް ކަމުގައިވާ އިންސާނީ ހައްގު ތަކާއި، ހެޔޮ ވެރިކަމާއި، ދެމެހެއްޓެނިވި ތަރައްގީގެ މަގުގައި ސާބިތުވެ ހުންނަވާނޭ ކަމުގެ ޔަގީންކަން އެމަނިކުފާނުގެ މެސެޖުގައި ދެއްވާފައިވެ އެވެ.

މިދިޔަ އަހަރު ސަމޯއާގައި ބޭއްވި ކޮމަންވެލްތު އިސްވެރީންގެ ބައްދަލުވުމަކީ، ކޮމަންވެލްތުން އެއްބައިވަން ތަކަމާއި އެއްބާރުލުމަށް ދޭ އަހަންމިއްޔަތު ރަމްޒުކޮށްދިން ބައްދަލުވުމެއްގެ ގޮތުގައި އެމަނިކުފާނު ސިފަކުރެއްވި އެވެ. އަދި އެ ބައްދަލުވުމުގެ ނަތީޖާ، އަމަލީގޮތުން ދެއްކުމަށް، އެކުގައި މަސައްކަތް ކުރުން ލާޒިމު ކަމުގައި އެ މަނިކުފާނު ވިދާޅުވި އެވެ.

ރައީސްގެ މެސެޖު ނިންމަވާލައްވާފައި ވަނީ، ކޮމަންވެލްތުގެ ކޮންމެ ފަރުދެއްގެ ކުރިއެރުން ކަށަވަރު ކުރުމަށް ޓަކައި، ކޮމަންވެލްތާއި މެންބަރު ގައުމުތަކާއެކު އޮތް ގުޅުން ހަރުދަނާ ކުރުމަށް ރާއްޖެއިން ތައްޔާރަށް އޮތް ކަމަށް ވިދާޅުވަމުންނެވެ.