އާރުޓީއެލް ބަސްތަކުން ހިލޭ ދަތުރު ކުރެވޭ ކަމަށް ބުނެ ސްކޭމެއް ހިންގާތީ އެ ކަމަށް ސަމާލުވުމަށް އެމްޓީސީސީން އެދެފި އެވެ.
އެމްޓީސީސީން ކުރި އެކްސް ޕޯސްޓުގައި ބުނީ އެ ކުންފުނީގެ ދަށުން ހިންގަމުން އަންނަ ރާއްޖެ ޓްރާންސްޕޯޓް ލިންކުން ހިލޭ ދަތުރު ކުރެވޭ ކަމަށް ބުނެ، ފޭސްބުކު ޕޭޖެއް މެދުވެރިކޮށް ސްކޭމެއް ހިންގާތީ އެ ކަމަށް ސަމާލުވުމަށް އިލްތިމާސް ކުރާ ކަމަށެވެ.
އެ ފޭސްބުކު ޕޭޖުގައި ބުނެފައި ވަނީ ސްމާޓު ކާޑެއް މެދުވެރިކޮށް ތިން މަސް ދުވަހުގެ މުއްދަތަށް އާރުޓީއެލް ބަހުގައި ދަތުރު ކުރުމުގެ ފުރުސަތު ފަހިކޮށްދޭނެ ކަމަށެވެ.
އެ ޕޭޖްގައި ހިންގަމުން އަންނަ އެއްވެސް ހަރަކާތަކީ އެމްޓީސީސީ ނޫނީ އާރުޓީއެލްއާ އެއްވެސް ގުޅުމެއް ނެތް ކަމެއް ކަމަށް ވެސް އެމްޓީސީސީއިން ބުނެފައިވެ އެވެ.
އެމްޓީސީސީން ބުނީ އެމްޓީސީސީގެ ފަރާތުން އައު ހިދުމަތެއް ނުވަތަ ޕްރޮޑަކްޓެއް ތައާރަފު ކުރާ ނަމަ އެ ކަމެއް ރަސްމީކޮށް ފެށުމުގެ ކުރީން އެ ކުންފުނިން މީޑިއާ މެދުވެރިކޮށް އެ ކަމާބެހޭ މައުލޫމާތު ހިއްސާ ކުރާނެ ކަމަށެވެ. އަދި އެ ޕޭޖުގައި ހިންގަމުން އަންނަ އެއްވެސް ކަމަކީ އެމްޓީސީސީ އާއި އާރުޓީއެލްއާ ވެސް ގުޅުމެއް ނެތް ކަމެއް ކަމަށް ވެސް ބުންޏެވެ.
އޭގެ އިތުރުން އެމްޓީސީސީއަށް ރައްޔިތުން ކުރާ އިތުބާރުގެ ބޭނުން ނަހަމަ ގޮތުގައި ހިފައި ނުހައްގުން ފައިސާ ހޯދުމަށް ކުރާ މިޒާތުގެ ނާތަހުޒީބު އަމަލުތައް ވެސް ވަނީ ހަރުކަށި އިބާރާތުން ކުށްވެރިކޮށްފަ އެވެ.
ކޮމެންޓް