ލާމަރުކަޒީ ނިޒާމަށް ހަގީގީ ބާރުވެރިކަން ދިނުމަށް ފެއްޓެވި މަސައްކަތްޕުޅު ކުރިއަށް ގެންދަވާނޭ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.
ލާމަރުކަޒީ ދުވަހާއި ގުޅިގެން އެ މަނިކުފާނު ކުރެއްވި ރަސްމީ އެކްސް ޕޯސްޓުގައި ލާމަރުކަޒީ ނިޒާމަށް ހަގީގީ ބާރުވެރިކަން ހޯދައިދިނުމުގެ ގޮތުން، ރައްޔިތުންނާ ގާތުން، ރައްޔިތުންނާ ގުޅިގެން މިހާތަނަށް ސަރުކާރުން މަސައްކަތްކޮށްފައިވާ ކަން ފާހަގަ ކުރައްވާފައިވެ އެވެ.
އެގޮތުން، ރަށްރަށަށް ދަތުރުފުޅު ކުރައްވައި، ކައުންސިލް ތަކުގެ އަޑުއައްސަވާ، ރައްޔިތުންނާއި ގާތުން ބައްދަލުވެ، ރައްޔިތުންނަށް ކުރިމަތިވެފައިވާ ގޮންޖެހުންތައް ހައްލު ކުރުމަށް ގިނަ މަސައްކަތް ތަކެއް ކުރެވިފައިވާ ކަމުގައި އެ މަނިކުފާނު ވިދާޅުވި އެވެ.
މިފަދަ ދަތުރުފުޅު ތަކަކީ އެ މަނިކުފާނުގެ ވައުދާއި އެއްގޮތަށް ރައްޔިތުންގެ ގާތަށް ވަޑައިގެން ރައްޔިތުންގެ ހާލަތު ބެއްލެވުމަށާއި މި ހިނގާ ރިޔާސީ ދައުރުގެ ތެރޭގައި މީހުން ދިރިއުޅޭ ކޮންމެ ރަށަކަށް ދެ ފަހަރު ޒިޔާރަތް ކުރެއްވުމަށް ވެވަޑައިގެންފައިވާ ވައުދާއި އެއްގޮތަށް ސިލްސިލާކޮށް ކުރިއަށްގެންދަވާ ދަތުރުފުޅު ތަކެކެވެ.
ލާމަރުކަޒީ ދުވަހަކީ، ފެބުރުވަރީ މަހުގެ 26 ވަނަ ދުވަހެވެ. މި ދުވަހަކީ، ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގާން ފެށުން ފާހަގަ ކުރާ ދުވަހެވެ.
ކޮމެންޓް