ގުދުރަތީ ކާރިސާތަކުން ސަލާމަތްވެފައިވާ ދަނޑުވެރިކަމުގެ ސިނާއަތެއް ގާއިމު ކުރުން މުހިއްމު: ސާޖިދާ

ވަށާޖެހޭ، ދެމެހެއްޓެނިވި އަދި ގުދުރަތީ ކާރިސާތަކުން ސަލާމަތްކަން ކަށަވަރުކުރެވޭ، ދަނޑުވެރިކަމުގެ ސިނާއަތެއް ރާއްޖޭގައި ގާއިމު ކުރުމަކީ މުހިންމު ކަމެއް ކަމުގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ވިދާޅުވެއްޖެ އެވެ.

 އެކަމަނާ މިހެން ވިދާޅުވީ، "ކްލައިމެޓް ރެޒިލިއެންޓް އެގްރިކަލްޗަރ ފޮ ފުޑް ސެކިއުރިޓީ އިން މޯލްޑިވްސް" ކޮންފަރެންސް ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ.

މެޑަމް ސާޖިދާގެ ވާހަކަފުޅުގައި ދެމެހެއްޓެނިވި ދަނޑުވެރިކަމުގެ އުސޫލުތަކުގެ މައްޗަށް ބިނާކޮށް، މޫސުމީ ބަދަލުތަކުގެ ސަބަބުން އިންސާނީ ދިރިއުޅުމާއި ދަނޑުވެރިކަމަށް އަންނަ ބަދަލުތަކަށް ވިލުންވެރިކަން އިތުރު ކުރުމާއި، ދަނޑުވެރިކަމުގެ ދާއިރާއަށް އިންވެސްޓްކުރުން އިތުރުކުރުމަށް ޓަކައި ދަނޑުވެރިންގެ ފަންނީ ގާބިލުކަން އިތުރު ކުރުމުގެ މުހިންމު ކަމުގެ މައްޗަށް އަލިއަޅުއްވާލައްވާފައިވެ އެވެ. އަދި، ކެމިކަލް އެކުލެވޭ ގަސްކާނާގެ ސަބަބުން ދެމެހެއްޓެނިވި ދަނޑުވެރިކަމަށް ކުރާ ނޭދެވޭ އަސަރުތަކުގެ މައްޗަށްވެސް އެ ކަމަނާގެ ވާހަކަފުޅުގައި ފާހަގަ ކުރެއްވި އެވެ.

ދަނޑުވެރިކަމުގެ ދާއިރާ އިތުރަށް ތަރައްގީ ކުރުމަށް ޓަކައި އެންމެ ފަހުގެ އިޖާދީ ގޮތްތަކާއި މައުލޫމާތުގެ ބޭނުން ކުރުމާއި، ހާއްސަކޮށް، އާޓިފިޝަލް އިންޓެލިޖެންސް، (އޭއައި) ގެ ބޭނުން ހިފުމުގެ މައްޗަށް ވެސް އެކަމަނާގެ ވާހަކަފުޅުގައި އަލިއަޅުއްވައިލެއްވި އެވެ.

އެފަދަ ޒަމާނީ އައު އީޖާދު ތަކުގެ ބޭނުން ހިފައި، އަދި ލިބިފައިވާ ވަސީލަތް ތަކުގެ ބޭނުން ފުރިހަމައަށް ކޮށްގެން، އުފެއްދޭ މިންވަރު އިތުރުކޮށް، ވިލުންވެރި، ދެމެހެއްޓެނިވި ކާބޯތަކެތީގެ ނިޒާމެއް ގާއިމު ކުރުމުން، ރައްޔިތުންނަށް އޭގެ ފައިދާލިބިގެންދާނޭ ކަމުގައި އެ ކަމަނާ ވިދާޅުވި އެވެ.

އަދި އެފަދަ ދެމެހެއްޓެނިވި ކާބޯތަކެތީގެ ނިޒާމެއްގެ ތެރެއިން ގައިންގަޔަށް ނާރާ ބަލިތައް މަދުކުރެވި، ރައްޔިތުންގެ ދުޅަހެޔޮކަން ޔަގީން ކުރެވިގެންދާނޭ ކަމުގައި އެކަމަނާ ވިދާޅުވި އެވެ.

މީގެ އިތުރުން، އެ ފަދަ ނިޒާމެއްގެ ތެރެއިން، ކާބޯތަކެތީގެ ފެންވަރު ކަށަވަރު ކުރެވި، އަދި ފެންވަރު ކަށަވަރު ކުރުމަށް، އިތުރު ފިޔަވަޅުތައް އެޅުމުގެ ފުރުސަތު ފަހި ކުރެވޭ ގޮތަށް އެ ނިޒާމު ފަރުމާ ކުރެވޭނެ ކަމަށް ވެސް މެޑަމް ސާޖިދާ ވިދާޅުވި އެވެ.