ވަގަށް ސިނގިރޭޓް އެތެރެކުރި މައްސަލައިގެ ތަހުގީގު ފުލުހުން ފަށައިފި

ވަގަށް ރާއްޖެއަށް ސިނގިރޭޓު އެތެރެކުރި މައްސަލަ ފުލުހުން ތަހުގީގު ކުރަން ފަށައިފި އެވެ.

ރާއްޖެއަށް 200 މާސްޓާ ކާޓަން މެންޗެސްޓާ ސިނގިރޭޓް ސިއްރުން އެތެރެކުރި މައްސަލައެއް ފުލުހުންނާއި މޯލްޑިވްސް ކަސްޓަމްސް ސާވިސްއިން ގުޅިގެން ތަހުގީގު ކުރަމުން އަންނަ ކަމަށް އެ އިދާރާއިން ބުންޏެވެ.

މި މައްސަލައިގައި ތުހުމަތު ކުރެވެނީ ދަ ހޯކްސް ޕްރައިވެޓް ލިމިޓެޑްގެ ފޮރިންގޮއިން އުޅަނދެއް ކަމަށްވާ ދަ ހޯކްސް ޖަވާހިރު ބޯޓުން މި ސިނގިރޭޓްތައް ރާއްޖެއަށް އެތެރެކޮށްފައިވާ ކަމަށެވެ.

ފުލުހުން މިއަދު ބުނިގޮތުގައި މިހާތަނަށް ބެލި ބެލުމުން މިދިޔަ އަހަރުގެ އޮކްޓޫބަރު 24 ވަނަ ދުވަހު ރާއްޖެއަށް އައި ދަ ހޯކްސް ޖަވާހިރު ބޯޓުން މި ސިނގިރޭޓްތައް ބޯޓުގެ މެނިފެސްޓުގައި ނުހިމަނައި ރާއްޖެ ގެނައިކަން އެނގިފައިވެއެވެ.

އަދި އޮކްޓޫބަރު 25 ވަނަ ދުވަހުގެ ރޭގަނޑުގެ ވަގުތެއްގައި ކ. ތިލަފުށީގައި ހުންނަ ހޯކްސް ބޯޓު ޔާޑުގެ ޖެޓީއަށް މި ސިނގިރޭޓްތައް ބާލައިގެން ސިއްރުން ރާއްޖެއަށް ވަނީ އެތެރެކޮށްފައި ކަމަށް ފުލުހުން ބުނެއެވެ.

މި މައްސަލައިގެ ތަހުގީގު ބިނާވެފައިވަނީ މައިގަނޑު ދެ ކުށެއްގެ މައްޗަށް ކަމުގައި ފުލުހުން މައުލޫމާތު ދެއެވެ.

އޭގެ ތެރޭގައި ހިމެނެނީ ކަސްޓަމްސްގެ ގާނޫނުގެ 97 ވަނަ މާއްދާގެ ދަށުން ރާއްޖެއަށް ސިއްރުން މުދާ އެތެރެކުރަން އުޅުމުގެ ކުށާއި، މަނީ ލޯންޑްރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން މަނީ ލޯންޑްރިން ކުށެވެ.

ހޯކްސްގެ ބޯޓުން މި ސިނރޭޓްތައް އެތެރެ ކުރަން އުޅެނިކޮށް ހިފަހައްޓާފައިވަނީ މިދިޔަ އޮކްޓޯބަރު މަހުގެ 25ވަނަ ދުވަހެވެ.