ޒަކިއްޔާގެ މަރުގެ ތަހުގީގަށް ފުލުހުން އެފްބީއައިގެ އެހީ ހޯދަނީ

ނ. ހޮޅުދޫ ގެއެއްގެ ތެރޭގައި ޒަހަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާ، 50،ގެ މަރުގެ ތަހުގީގަށް ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި)ގެ އެހީ ހޯދަން ފަށައިފި އެވެ.

ފުލުހުން ބުނީ ޒަކިއްޔާގެ މަރުގެ މައްސަލައިގެ ތަހުގީގަށް އިތުރު ބައެއްގެ ރައުޔު ހޯދަން ފަށާފައިވާ ކަމަށާއި އެގޮތުން ތަހުގީގުގައި ފުލުހުން ހޯދާފައިވާ ހޯދުންތައް އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަނާ ހިއްސާކޮށް އެހީތެރިކަން ހޯދުމުން އަންނަ ކަމަށެވެ.

މީގެ އިތުރުން ފުލުހުންގެ ސީނިއާ ތަހުގީގު ޓީމެއް މި މައްސަލަ ރިވިއު ކުރުމަށް ޓަކައި ހޮޅުދޫއަށް ޒިޔާރަތްކޮށް މި މައްސަލައިގެ ތަހުގީގު މުރާޖައާކޮށް، އިތުރަށް ބަލާން ޖެހޭ ކަންކަން ދެނެގަތުމުގެ މަސައްކަތް ވެސް ކޮށްފައިވާ ކަމަށް ފުލުހުން ބުންޏެވެ.

ޒަކިއްޔާ މޫސާގެ މަރުގެ މައްސަލައިގެ ތަހުގީގު ފުލުހުން އަދިވެސް ގެންދަނީ ކުރިއަށެވެ.

ނަމަވެސް މި މައްސަލައިގައި އަދި މިހާތަނަށް އެއްވެސް މީހަކު ހައްޔަރުކޮށްފައެއް ނުވެ އެވެ.

ޒަކިއްޔާ ސެޕްޓެމްބަރު މަހުގެ 10 ވަނަ ދުވަހުގަ މަރުވެފައި އޮއްވައި ފުރަތަމަ ފެނުނީ އެ ގޭގެ ކުނި ނަގަން ދިޔަ ބިދޭސީންތަކަކަށެވެ.

އޭނާ މަރުވެފައި އޮތް ތަނުން ބޮޑު ވަޅިއެއް ވެސް ފެނިފައިވާއިރު، ކަރުގައި ޒަހަމްތަކެއް ހުއްޓެވެ.