މިގައުމަށް ކުރިމަތިވެފައިވާ ކޮރަޕްޝަންގެ ވަބާ ނައްތާލެވޭނީ އެފަދަ މައްސަލަތަކުގެ ތުހުމަތުކުރެވޭ ހުރިހާ ފަރާތަކާމެދުވެސް ގާނޫނާ އެއްގޮތްވާ ގޮތުގެމަތިން ހަމަހަމަކަމާއެކު އަމަލު ކުރެވިގެން ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ހިޔާނާތުގެ މައްސަލަތަކާ ގުޅިގެން ކުރީގެ ނައިބު ރައީސް އަހުމަދު އަދީބާއި އިތުރު ބަޔަކާ އެކު ޕްރޮސެކިއުޓާ ޖެނެރަލް އޮފީހުން އެކުލަވާލާފައިވާ އިމިއުނިޓީ އަދި އެއްބާރުލުން ދިނުމުގެ އެއްބަސްވުން ނިމުމަކަށް ގެނައުމަށް ނިންމުމުންނެވެ.
ޓްވިޓާގައި ކުރެއްވި ޕޯސްޓެއްގައި ރައީސް ވަނީ އެމްއެމްޕީއާރްސީގެ ހިޔާނާތުގެ ބޮޑު މައްސަލައިގައި ބައެއް ފަރާތްތަކަށް ތަފާތު އިމްތިއާޒްތަކެއް ލިބިދީ އެމީހުންގެ މައްޗަށް އިތުރު ދައުވާ ނުކުރުމަށް އެއެްބަސްވެ ކުރީގެ ޕްރޮސިކިއުޓާ ޖެނެރެލް ހައްދަވާފައިވާ އެއްބަސްވުންތައް ބާތިލް ކުރައްވައި އެމީހުންގެ މައްޗަށް ތުހުމަތު ކުރެވޭ މައްސަލަތައް ތަހުގީގު ކުރައްވަވައި އެ އޮފީހަށް ފޮނުވުމަށް ކަމާބެހޭ އިދާރާތަކަށް ޕްރޮސިކިއުޓާ ޖެނެރަލް އެންގެވުމާގުޅިގެން މަރުހަބާ ދަންނަވާފަ އެވެ.
"ޒަމާނުއްސުރެން މިގައުމަށް ކުރިމަތިވެފައިވާ ކޮރަޕްޝަންގެ ވަބާ މިގައުމުން ނައްތާލެވޭނީ އެފަދަ މައްސަލަތަކުގައި ހިމެނޭކަމަށް ތުހުމަތުކުރެވޭ ހުރިހާ ފަރާތަކާމެދުވެސް ގާނޫނާ އެއްގޮތްވާ ގޮތުގެމަތިން ހަމަހަމަކަމާއެކު އަމަލުކުރެވިގެން،" ރައީސް ވިދާޅުވި އެވެ.
ކުރީގެ ނައިބު ރައީސް އަދީބާއެކު އިތުރު ތިން މީހަކާއެކު އެކުލަވައިލި އިމިއުނިޓީ އަދި އެއްބާރުލުން ދިނުމުގެ އެއްބަސްވުން ނިމުމަކަށް ގެނައުމަށް ނިންމާފައިވަނީ އިއްޔެގެ ވަގުތެެއްގަ އެވެ.
އެއީ، ހ. ސާމަރާ، އަހްމަދު އަދީބު އަބްދުލްޣަފޫރު އާއި މ. ލޭންޑް އޮފް ގާޑެން، އަހްމަދު އިޝްފާހް އަލީ އާއި މ. ސެސްނާ، މުހައްމަދު އައްލާމް ލަތީފްގެ އިތުރުން ގ. އޮއިވާލި، މުހައްމަދު ހުސައިން އެވެ.
މި ބޭފުޅުންގެ އިތުރުން ހ. އާހަމަ، އަބްދުالله ޒިޔާތުއާ އެކު ވެފައިވާ އެއްބަސްވުން ވެސް ވަނީ 2022 އޮގަސްޓު މަސް ތެރޭގައި ނިމުމަކަށް ގެނެސްފަ އެވެ.
ކޮމެންޓް