މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ހިޔާނާތުގެ މައްސަލަތަކާ ގުޅިގެން ކުރީގެ ނައިބު ރައީސް އަހުމަދު އަދީބާއި އިތުރު ބަޔަކާ އެކު ޕްރޮސެކިއުޓާ ޖެނެރަލް އޮފީހުން އެކުލަވާލާފައިވާ އިމިއުނިޓީ އަދި އެއްބާރުލުން ދިނުމުގެ އެއްބަސްވުން ނިމުމަކަށް ގެނައުމަށް މިއަދު ނިންމައިފި އެވެ.
ޕީޖީ އޮފީހުން ބުނި ގޮތުގައި ކުރީގެ ނައިބު ރައީސް އަދީބާއެކު އިތުރު ތިން މީހަކާއެކު އެކުލަވައިލި އިމިއުނިޓީ އަދި އެއްބާރުލުން ދިނުމުގެ އެއްބަސްވުން ނިމުމަކަށް ގެނައުމަށް ނިންމާފައިވަނީ މިއަދު އެވެ. އެއީ
1. ހ. ސާމަރާ، އަހްމަދު އަދީބު އަބްދުލްޣަފޫރު
2. މ. ލޭންޑް އޮފް ގާޑެން، އަހްމަދު އިޝްފާހް އަލީ
3. މ. ސެސްނާ، މުހައްމަދު އައްލާމް ލަތީފް
4. ގ. އޮއިވާލި، މުހައްމަދު ހުސައިން
މި ބޭފުޅުންގެ އިތުރުން ހ. އާހަމަ، އަބްދުالله ޒިޔާތުއާ އެކު ވެފައިވާ އެއްބަސްވުން ވެސް ވަނީ 2022 އޮގަސްޓު މަސް ތެރޭގައި ނިމުމަކަށް ގެނެސްފަ އެވެ.
އެ އޮފީހުން ބުނީ މި އެއްބަސްވުންތައް ނިމުމަކަށް ގެނައުމަށް ނިންމާފައި ވަނީ މި އެއްބަސްވުންތައް އެކުލަވައިލާފައި ވަނީ އެމްއެމްޕީއާރްސީގެ ހިޔާނާތުގެ މައްސަލައިގެ ތަހުގީގު ކުރިއަށް ގެންދިއުމަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމުގެ މަސައްކަތަށް އެއްބާރުލުން ހޯދުމުގެ ބޭނުމުގައި ކަމަށެވެ.
ނަމަވެސް މި މީހުންގެ ފަރާތުން މައްސަލައިގެ ތަހުގީގަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމުގައި އެކަށީގެންވާ އެއްބާރުލުން ލިބެމުން ނުދާ ކަމަށް ތަހުގީގީ އިދާރާތުން މައުލޫމާތު ދީފައިވާ ކަމަށެވެ.
މި އެއްބަސްވުންތައް ނިމުމަކަށް ގެނައުމާއެކު، މި އެއްބަސްވުން ތަކުގެ ސަބަބުން ކުރިއަށް ނުގެންދެވި ހުރި، މި މީހުންގެ މައްޗަށް ތުހުމަތު ކުރެވޭ މައްސަލަ ތަކުގެ ތަހުގީގު ކުރިއަށްގެންގޮސް ވީ އެންމެ އަވަހަކަށް އެ މައްސަލަ ފުލުހަށާއި އެންޓިކޮރަޕްޝަން ކޮމިޝަނަށް އަންގާފައި ވާނެ ކަމަށް ވެސް ޕީޖީން ބުނެ އެވެ.
ކޮމެންޓް