އިނގިރޭސި ސަފީރު ދިރިއުޅުއްވާ ގޭގައި ބޮޑުކުރި ރުއް ހުޅުމާލޭގައި އިންދައިފި

އިނގިރޭސި ސަފީރު ކެރޮން ރޮސްލާ ރާއްޖޭގައި ދިރިއުޅުއްވާ ގޭގެ ޓެރަސްގައި ބޮޑުކުރި ރުކެއް ހުޅުމާލޭ ސެންޓްރަލް ޕާކްގައި އިންދައިފި އެވެ.

އެ ގަސް ސެންޓްރަލް ޕާކްގައި އިންދާފައި ވަނީ އެޗްޑީސީގެ މުވައްޒަފުން އިއްޔެ ބޭއްވި ފެއާވެލް އިވެންޓެއްގަ އެވެ.

ރާއްޖޭގައި ހުންނަ އިނގިރޭސި ވިލާތުގެ ހައި ކޮމިޝަނުގައި ފަސް އަހަރުގެ ދައުރެއް ފުރިހަމަ ކުރެއްވުމަށް ފަހު، ކެރޮން ވަރަށް އަވަހަށް އެނބުރި ގައުމަށް ވަޑައިގަންނަވާ ގޮތަށް ހަމަޖެހިފައިވެ އެވެ.

އެޗްޑީސީން ބުނިގޮތުގައި ސެންޓްރަލް ޕާކްގައި މި ރުށް އިންދީ ހައި ކޮމިޝަނަރުގެ ހައިސިއްޔަތުން ކެރޮން ކޮށްދެއްވި ހިދުމަތުގެ އަގު ވަޒަން ކުރުމުގެ ގޮތުންނެވެ.

އެއީ 2021 ވަނަ އަހަރު އޭނާއަށް ހަދިޔާއަކަށް ލިބިވަޑައިގެންނެވި ކާއްޓެއް ގޭގެ ޓެރަސްގައި ބާއްވައިގެން ބޮޑުކުރި ރުކެއް ކަމަށް ކެރޮން ވިދާޅުވި އެވެ. އެއީ ބ. ހިތާދޫން ގެނައި ކާއްޓެކެވެ. އެ ކާށި ހަދިޔާ ކުރެއްވީ އިނގިރޭސި ހައި ކޮމިޝަނުގެ ކުރީގެ ކްލައިމެޓް ޗޭންޖު ޕޮލިސީ މެނޭޖަރު އަހްމަދު ފިޒާލެވެ.

އެ ރުކަށް ކެރޮން ދެއްވި ނަމަކީ "ޝައި" އެވެ.

އޭނާ ވަނީ އެ ރުށް ހެދި ބޮޑުވަމުން އައި އެކި ދުވަސްވަރު ބައެއްގެ ފޮޓޯތައް ވެސް އެކްސްގައި ހިއްސާކުރައްވާފައެވެ.

ކެރޮން އަކީ ރާއްޖޭގައި އިނގިރޭސި ވިލާތުގެ އެމްބަސީއެއް އަލަށް ހުޅުވައި، ސަފީރަކަށް ވަޑައިގެންނެވި ފުރަތަމަ ބޭފުޅާ އެވެ.

ރާއްޖޭގައި ހުންނަވާ އިނގިރޭސި ސަފީރުގެ މަގާމަށް ކެރޮން ވަޑައިގަތީ 2019 ވަނަ އަހަރުގެ އޮކްޓޯބަރު 30ގަ އެވެ.