ޣައްޒާގައި އިސްރާއީލުން ހިންގާ ޖަރީމާތަކާ ގުޅިގެން ދުނިޔޭގެ ގައުމުތަކަށް ދަތުރުކުރާ އިސްރާއީލުގެ ސިފައިން ހައްޔަރުކުރުމުގެ އަމުރުތައް ނެރެމުންދާތީ އިސްރާއީލު ސިފައިންގެ އާއިލާތަކުން ކަންބޮޑުވުން ފާޅުކުރަން ފަށައިފިއެވެ.
އާއިލާތަކުން ބޮޑުވަޒީރު ނަތަންޔާހޫއަށް ފޮނުވި ސިޓީއެއްގައި ބުނެފައިވަނީ އިސްރާއީލު ސިފައިން ހިމާޔަތް ކުރާނެ ސްޓްރެޓެޖީއެއް ސަރުކާރުން ގެންގުޅޭތަން ނުފެންނަ ކަމުގައެވެ.
މިފަހުން ބްރަޒީލްގެ ކޯޓަކުން އިސްރާއީލު ސިފައިންގެ މީހަކު ހައްޔަރު ކުރުމުގެ އަމުރު ނެރުނު ނަމަވެސް، އޭނާ ވަނީ ސިއްރިޔާތުގައި ފިލާފައެވެ. މީގެ ކުރިން ސްރީލަންކާއިން ވެސް އިސްރާއީލު ސިފައިންގެ މީހަކު ވަނީ ސިއްރު ގޮތަކަށް ފިލައި ރައްކާވެފައެވެ.
"ހާއާރެޓްސް" ނޫހުގެ ރިޕޯޓުގައި ބުނެފައިވަނީ އިސްރާއީލު ސިފައިންގެ ގިނަ ބަޔަކު އެމެރިކާއާއި ޔޫރަޕްގެ ބައެއް ގައުމުތައް ފިޔަވައި އެހެން ގައުމުތަކަށް ދަތުރުކުރަން މިހާރު ބިރުގަންނަ ކަމަށެވެ. އެއީ ހަނގުރާމައިގެ ޖަރީމާއާއި ގަތުލުއާންމުތައް ހިންގާކަމުގެ ކުށުގައި އިސްރާއީލު ސިފައިންގެ އެތައް ބަޔަކު ހައްޔަރު ކުރުމުގެ ސިއްރު އަމުރުތަކެއް ބައިނަލްއަގްވާމީ ޖިނާއީ ކޯޓުން ނެރެފައިވާކަމަށް ބެލެވޭތީއެވެ.
އިސްރާއީލުގެ އިދިކޮޅު ލީޑަރު ޔެއިރު ލެބެޑް ވަނީ އިސްރާއީލު ސިފައިންނަށް ދުނިޔޭގައި ރައްކާތެރިކަން ނެތުމަކީ އިސްރާއީލަށް ކުރިމަތިވާ ބޮޑު ކާރިސާއެއްކަމަށް ސިފަކޮށްފައެވެ. އޭނާ ބުނި ގޮތުގައި މިއީ ނަތަންޔާހޫގެ ވެރިކަމުގައި ދުނިޔޭގައި އިސްރާއީލު އެކެހެރި ވެފައިވާ މިންވަރު ހާމަކޮށްދޭ ކަމެކެވެ.
މި ހާލަތުގައި އިސްރާއީލު ސިފައިންނަށް ރައްކާތެރިކަން ކަށަވަރުކޮށްދިނުމަށް ސަރުކާރުން އަޅާނެ ފިޔަވަޅުތަކާ މެދު ގިނަ ބައެއްގެ ސުވާލު އުފެދިފައިވެއެވެ. އަދި މި މައްސަލައަކީ އިސްރާއީލުގެ ބައިނަލްއަގުވާމީ ގުޅުންތަކަށް ވެސް އަސަރުކުރާނެ ކަމެއްގެ ގޮތުގައި ބެލެވެއެވެ.
ކޮމެންޓް