އިންޑިއާގެ އެހީގައި ވެރިކަން ވައްޓާލަން ރޭވި ކަމަށް ބުނާ ވާހަކަ ދޮގުކޮށްފި

އަވައްޓެރި އިންޑިއާ އަޑީގައި އޮވެ، ރައީސް ޑރ. މުއިއްޒުގެ ވެރިކަން ވައްޓާލުމަށް މަސައްކަތްކުރިކަމަށް ބުނެ ނެރުނު ރިޕޯޓަކީ ކަނޑައެޅިގެން ދޮގެއްކަމަށް ހާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

އިންޑިއާގެ ވިއޯން ނިއުސްޗެނަލަށް ދެއްވި ބަސްދީގަތުމެއްގައި، ހާރިޖީ ވަޒީރު ވިދާޅުވީ، ވޮޝިންޓަން ޕޯސްޓްގައި ޝާއިއުކޮށްފައިވާ ރިޕޯޓަކީ ސައްހަ ރިޕޯޓެއް ނޫންކަމަށެވެ. އެ ރިޕޯޓްގައި ތުހުމަތުކޮށްފައިވަނީ އެއްވެސް ވަރަކަށް ހަގީގަތް އެކުލެވޭ ވާހަކަތަކެއް ނޫންކަމަށް ވަޒީރު ވިދާޅުވިއެވެ.

ރާއްޖެއާއި އިންޑިއާއާ ދެމެދު އޮތީ އެއަށްވުރެ މާ އިތުބާރުބޮޑު، ގާތްބަދަހި ގުޅުމެއްކަމަށް ވަޒީރު ފާހަގަކުރެއްވިއެވެ. އަދި ދެޤައުމުގެ ދެމެދު ގުޅުން ހީނަރުކުރަން އުޅޭބަޔަކުވެސް އުޅޭނޭކަން ފާހަގަކުރައްވަމުން، އިންޑިއާއިންވެސް އެކަން ދަންނަކަމަށް ވިދާޅުވިއެވެ.

ކުރީގެ ރައީސް ނަޝީދުވެސް ވަނީ މި ރިޕޯޓުގައިވާ ވާހަކަތައް ދޮގުކުރައްވާފައެވެ. އިންޑިއާއިން އައީ އަބަދުވެސް ދިވެހިންގެ ޑިމޮކްރަސީއަށް ތާއީދުކުރަމުން ކަމަށާއި، އެފަދަ ކަމަކަށް އިންޑިއާއިން ތާއީދެއް ނުކުރާނޭ ކަމަށް ރައީސް ނަޝީދު ވިދާޅުވިއެވެ.

ވޮޝިންގްޓަން ޕޯސްޓުގައި ޝާއިޢުކޮށްފައިވާ ރިޕޯޓުގައި ބުނެފައިވަނީ، މި އަހަރުގެ ޖަނަވަރީ މަހު، އިންޑިޔާގެ އިންޓެލިޖެންސް އޭޖެންސީ އާރްއޭޑަބްލިއުގެ އޭޖެންޓުން ދިވެހިރާއްޖޭގެ އިދިކޮޅު ފަރާތްތަކާއެކު ރައީސް މުޢިއްޒުގެ ވެރިކަން ވައްޓާލުމަށް މަޝްވަރާތައް ފެށި ކަމަށެވެ. ނަމަވެސް މި ރިޕޯޓުގައިވާ ވާހަކަތައް ރާއްޖޭގެ އިސް ފަރާތްތަކުން ވަނީ ދޮގުކުރައްވާފައެވެ.