މާލޭގެ ގެއެއްގައި ހަދާފައިވާ ބޮންޑެޑް ވެއަރހައުސްއަކުން ގިނައަދަދެއްގެ ސިނގިރޭޓް ގެއްލިފައިވާ މައްސަލައެއް ދިވެހި ފުލުހުންގެ ޚިދުމަތުން ތަޙުޤީޤުކުރަން ފަށައިފިއެވެ.
ބައެއް މީޑިއާތަކުން ރިޕޯޓްކޮށްފައިވާ ގޮތުގައި ގެއްލިފައިވަނީ 575 ކޭސް ސިނގިރޭޓެވެ. އެއީ 34،000 ކާޓޫނެވެ.
މި މައްސަލައާ ގުޅިގެން ހޯމް މިނިސްޓަރު އަލީ އިޙްސާން 'އެކްސް' މެދުވެރިކޮށް ވިދާޅުވެފައިވަނީ ވެއަރހައުސްގެ ވެރިފަރާތުން އެތަން ދޫކޮށް، އެހެން މަސައްކަތެއް އެތަނުގައި ކުރަމުންދިޔަ ކަމުގެ މަޢުލޫމާތު ލިބުމުން، ކަސްޓަމްސްއިން އެކަން ބަލައި، ވެއަރހައުސްގައި ހުރި މުދަލަށް ޑިއުޓީ ދެއްކުމަށް އަންގާފައިވާ ކަމަށެވެ.
"މިކަން ހިނގި ގޮތް ބަލައި، ޤާނޫނީ ފިޔަވަޅު އެޅުމަށް، ކަސްޓަމްސް އާއި ފުލުހުން ދަނީ ތަޙުޤީޤު ކުރަމުން،" މިނިސްޓަރު ވިދާޅުވިއެވެ. ނަމަވެސް ސިނގިރޭޓު ގެއްލުނު ގޮތާ ގުޅޭގޮތުން އިތުރު ތަފްސީލެއް ވަޒީރު ހާމަކުރައްވާފައެއް ނުވެއެވެ.
މިނިސްޓަރު އިޙްސާން ވިދާޅުވި ގޮތުގައި މާލޭގެ އެކި ގޭގެ އާއި އެޕާޓްމަންޓުތަކުގައި ޒަމާންތަކެއް ވަންދެން ބޮންޑެޑް ވެއަރހައުސްތައް ހިންގަމުން އައި ނަމަވެސް، މިއީ ސަލާމަތީ ގޮތުން އަދި ކޮންޓްރޯލް ކުރުމަށް އެންމެ ރަނގަޅު ގޮތް ނޫން ކަމަށް ފެންނާތީ، ސަރުކާރުން މިހާރު ވަނީ ބޮންޑެޑް ވެއަރހައުސްތައް ހިންގޭނީ ހަމައެކަނި ކަސްޓަމްސްގެ ފުރިހަމަ ކޮންޓްރޯލް އޮންނަ ސަރަހައްދުތަކުގައި އެކަނި ކަމަށް ކަނޑައަޅާފައެވެ.
ކޮމެންޓް